ÎHD: Tepişteyî binê înkeceyî de yê

sêşem 28 tîrmehê 2020 - 08:47

  • Şubeyê ÎHDyî yê Anqara raporê îşkence û binpaykerdişê heqan ê zîndananê Herêma Anatoliaya Mîyanêne yê 3 aşman pare kerd.

Şubeyê ÎHDyî  yê Anqara raporê îşkence û binpaykerdişê heqan ê zîndananê Herêma Anatoliaya Mîyanêne û dormeyê ci yê 3 aşman pare kerd.

Kombîyayîş de Endama Heyetê Rayberdişî yê Merkezî yê Komeleya Heqanê Merdiman (ÎHD) Nuraye Çevîrmen qisey kerd.  Çevîrmene ard ziwan ke  aşmanê nîsane, gulane û hezîrane yê 2020î de zîndananê Herêma Anatoliaya Mîyanêne  ra 123 û zîndananê bînan ra 42 muracatî înan rê bîyî û înan raporê binpaykerdişê heqan ame kerd.

Rapor de nê ameyî parekerdene:

''Nêweşî sewqê nêweşxane nebênê, rixmo ke ame waştene cayê tepişteyan dezefnfekte nêbîyî, hewceyê tepişteyanê nêweşanê giranan nînê caardene, tepişteyan wextê pandemî de îmkananê weşî ra feyde nêdî, nêweşî nêvejîyê revîrî, malezeyê pakîye yo ke destpêkerdişê pandemî de bisînor ame  dayene nika nêdîyeno, no malzeme bi zemî se ra se yeno rotene, tay tepişteyan rê destûrê hewa girewtişî çîn o, maske û lapîkî rixmo ke ameyî waştene zî nînê dayene.

Reyna nê zîndanan  de tewr tay 32 tepişteyî raştê îşkence û muemeleyê xirabî ameyî. Bolu de tepişteyêk ame derbkerdene, nêame berdene nêweşxane û cezaya dîsîplînî ameye dayene. Kirşehîr de zexto psîkolojîk am kerdene, tay tepişteyî ameyî kuwayene. Tepişteyanê ke payra humartiş qebul nêkerd, raştê muameleyê xirabî ameyî. Seydîşehîr de 6 tepişteyê ke vera payra humartişî vejîyayî û raştê hêrişî ameyî, kewtî grevê vêşanîye. Nînan ra 2 tepişteyî hucre de yenê tepiştene û vîtamîn nêdîyeno înan.

Cezayê resanyîş û pêvînayîşî yenê dayene. Falîyetê sosyalî sey  spor, qiseykerdiş û kursan ameyî vindarnayene. Tepişteyî têna kesêk/e rê eşkenê telefon bikerê û pêvînayîşê telofonî ke hewte de rayêk yeno kerdene bi baheneyan yeno astengkerdene. Berê cayê hewa girewtişî rewî ra yenê qefilnayene û erey yenê akerdene. Radyoyê ke kantînî ra ameyî herînayene ameyî destsernayene. Kitab û kovare nêdîyenê. Rojnameyê sey Yenî Yaşam û Evrenselî rixmo ke qerarê hukmî çîn o nêdîyenê. Mektubî zî ya nêdîyenê ya zî zaf erey dîyenê. Zîndanê Afyonî de kitabo ke tepişteyêk bi xo kurdkî veto seba ke kurdkî ''kategorîya ziwanê xerîbî de ya'' nêdîyeno ci.''

Bado ke Çevîrmene rapor eşkera kerd vat gerek goreyê anorî merdiman bêro têgêrayene û waştişê tepişteyan bêrê caardene.

parvê bike

   

Yeni Özgür Politika

© Copyright 2020 Yeni Özgür Politika | Mafên belavkirinê parastî ne.