Meclîsê Hewlêrî hêrişê Tirkîya û Îranî kerdî rapor

sêşem 28 tîrmehê 2020 - 08:44

  • Komîsyonê Taybetî yê Parlamentoya Herêma Federe ya Kurdîstanî raporê derheqê hêrişanê Tirkîya û Îranî yê vera Başûrî de eşkera kerd. Rapor de ame parekerdene ke bi seyan dewî ameyî vengkerdene û xeylêk sivîlî şehîd bîyî.

29ê hezîrane de Parlamentoya Hewlêrî de pê beşdarîya komîsyonêko ke heyetanê pêşmerge, karanê zereyî, asayîş û meclîsanê herêmîyan ra ame meyydan, seba zîyaretê sînoranê Hewlêr, Dihok û Silêmanîyê bi wezîfedar. Komîsyonî netîceya îşxalê dewleta tirke û bambardumanê Îranî rapor kerdî. Rapor 4-5-6ê temmuze de qedîya û pêşkêşê serekatîya parlamento ame kerdene.

Rapor de nê doneyan ca girewtî:

Eyaletê Hewlêrî

-Qezaya Mêrgesor: 73 dewan ra 55 dewî veng bîyî. Bi desan kesî bombardumananê Tirkîya de şehîd bîyî. Semedo ke axpîn û erazîyê ci vêşîyayî zerarê şarî mîlyonan dolar o.

-Qezaya Çomanî: 156 dewî ameyî veng kerdene. Bombardumananê Îran û Tirkîya de serranê peyênan de bi desan kesî şehîd bîyî.

-Bajarekê Sîdekan: Nêzdîyê 104 dewî ameyî vengkerdene. Bax, axpîn û erazîyî ameyî vêşnayene.

-Bajarekê Rewandiz û qezaya Wertê: 2 dewî ameyî vengkerdene. Bi desan kesî şehîd û birîndar bîyî. Erazîyê zîretî ameyî vêşnayene û bi seyan heywanî telef bîyî.

Eyaletê Silêmanî:

-25ê hezîrana 2020î de dewa Kanîmasî hetê dewleta tirke ra dîyaye bombayan ver. Hêriş de 7 sivîlî birîndar bîyî. Xeylêk erazîyî vêşayî û zerarêko madî yo pîl resa dewijan.

-Qezaya Mawatî: Hêrişê vera dewa Sefre de dezgehê weşîye rijîya, ceyran birîya û keyeyanê dewijan zî zerarêko pîl dî.

-Qezaya Pêncwên: Temmuza 2015î hêrişê Îranî ra dima ame qedexekerdene ke dewijî şorê dewanê xo.

Eyaletê Dihok:

-Qezaya Zaxoyî: Serra 1992î ra nata qeza de 50 kesî şehîd bîyî û dewleta tirke bi dergîya 400 kîlometreyan û hîratîya 15 kîlometreyan derbazê Dihokî bîye. Qeza de 18 baregehê dewleta tirke estê.

-Qezaya Derkarî de 25 dewî dîyayî bombayan ver û nêno destûr dayene ke 200 rençberî şorê axpînanê xo.

-Qezaya Batîfa de 13 dewî dîyayî bombayan ver û 27 dewî zî ameyî vengkerdene.

-Qezaya Amedî: 198 dewî ameyî vengkerdene. 28 kesî hêrişan de şehîd bîyî. Garê de zî 72 dewî ameyî vengkerdene.

-Qezaya Kanî Masî de 17 baregehê leşkerî yê dewleta tirke estê. 6 dewî ameyî vengkerdene.

-Qezaya Şêladiê de 85 dewî ameyî vengkerdene.

-Qezaya Dêrelokî de 42 dewî ameyî vengkerdene.

Netîce

Bombardumanan de xeylêk dewî ameyî vengkerdene, bax û baxçeyî ameyî vêşnayene û bi hezaran kesî bêkar mendî.

Peynîya raporî de hêrişê dewleta tirke û Îranî ameyî şermezarkerdene û ame vatene ke ê dewletî pê bahaneya PKK û PJAKî hêrişê herême kenê. Hukmatê Herêma Kurdîstanî ra ame waştene ke Hukmatê Iraqî reyde seba çareserîye pêvînayîşan bikero.

ANF

parvê bike

   

Yeni Özgür Politika

© Copyright 2020 Yeni Özgür Politika | Mafên belavkirinê parastî ne.