Mehmet Sîncar ame yadkerdene

Parlamenterê DEPî Mehmet Sîncar 1993yî de Êlih de ame qetilkerdiş. Sîncar, Qoser de mezela xo ser de ame yadkerdene.

Parlamenterê DEPî Mehmet Sîncar, 4ê Êlule 1993yî de Êlih de ame qetilkerdiş. Sîncar, Qoser de mezala xo ser de bi girseyî ame yadkerdene. Mîyanê yadkerdoxan de Hemverfeka Partîya Çep a Keske Çîgdem Kiliçgun Uçare û Hemsereka Pêroyî ya DBPyî Salîha Aydenîze zî estibî. Bi seyan kesî mezela ey ser de ameyê têhet û payravindertişê hurmetî ame kerdene.

Heta hesab bidîyo do xoverdayîş dewam bikero

Hemsereka Pêroyî ya DBPyî Salîha Aydenîze mezele ser de qisey kerd û va, “Wa dewlete naye bizano ke 30 serrî ney, 300 serrî zî bivîyarê ma xo vîrî ra nêkenê. Wazenê Kurdan bêvîr bikerê la do meeşkê serbikewê. Înan embazê ma qetil kerdê ke ma xeta xoverdayîşî ra dûrî vinderê. La ewro mîlyonî na xete ser de şonê û wayîr vejîyenê. Pêro dinya zano ke Kurdî seba ziwan û nasnameyê xo xo ver danê. Na dewlete nêwaşte Kurdî sîyaseto demoratîk biramnê. Ma qetilkaranê Mehmet Sîncarî şinasnenê. Vanê hîzbulkontra yê la dewlete zana kam ê. Faîlê nê qetlîamî dewlet a. Peyê nê qetlîamî de zîhnîyetê dewlete estibi. Ewro nê çeteyan fînenê sîyaset. La Kurdî zanê ke dewlete kamî de îtîfaq kena. Dewlete wazena sîyasetê xo yê serranê 90an ‘meşrû’ ramojna. La no şar înan weş şinasneno. Ma mezela Mehset Sîncarî ser ra soz danê ke ma do nê xoverdayîşî biramnê. Heta ma birasê serkewtişî do xoverdayîşê ma mevindero.”

‘Ma do xoverdayîşî pîl bikerê’

Dima xanima ey Cîhan sîncare qisey kerd û dîyar kerd ke do xoverdayîş bêro pîlkerdene û soz da ke do dewaya înan pay ra bimana.

Qiseykerdişan ra dima qerenfîlî erzîyayê mezela sîncarî ser o û bi slogananê ‘Mehmet sîncar bêmerg o’ yadkerdiş ame qedîyayîş.

MA / MÊRDÎN