Meseleya Tirkîya PKK ney dişmenitîya Kurdan a

sêşem 20 sibatê 2024 - 16:32

  • Rojnemeger Hêmîn Hesenî va, “Tirkîya seba ke Iraq û Mintiqaya Kurdistanî paştî bidê pêvînayîşanê xo ramnena.”

Tirkîya, 17ê Nîsane 2022yî ra nata vera mintiqayanê Zap, Metîna û Avaşînî hêrişanê xo ramnena. Mabênê Tirkîya û Mintiqaya Kurdistanî de rojanê peyênan de pêvînayîşî zêdîyayê. Almanya de Serekwezîrê Mintiqaya Kurdistanî Neçîrvan Barzanî û Wezîrê Karanê Teberî yê Tirkîya Hakan Fîdan ameyê têhet. Rojnameger Hêmîn Hesenî polîtîkayê Tirkîya erjnayê.
 
‘Wazenê pêro hêzan biancê mîyanê şerî’
Hesenî va, “Dewleta Tirkan demêk verê cû heyetî erşawitê Iraq û Hewlêr. Hakan Fîdan hem şi Hewlêr hem şi Iraq. Dima hetê wezîrê pawitişî ra zî pêvînayîşî ameyê kerdene.Tirkîya wazena bin ê pêvînayîşan îşxalê xo hîna hîra bikera. Dewleta Tirkan wazena hunara baregehanê xo bizêdîna. Dewleta Tirkan wazena wa Iraq û Mintiqaya Kurdistanî vera PKKyî paştî bidê aye û wazena pêro hêzan bianca mîyanê şerî. Dewleta Tirkan kena ke mîyanê Kurdan de şerêk biqewimîyo.”
 
‘PKK reyde şer nêkena’
Hesenî dîyar kerd ke Tirkîya tena vera PKKyî ney vera Kurdan şer kena û va, “Dewleta Tirkan wazena wa Mintiqaya Kurdiatanî de pêro partî paştî bidê aye û hêrişanê aye rê veng mekerê. Ma nêşkenê vajê ke tena vera PKKyî şerêk est o. Şerê dewleta Tirkan vera Kurdan yeno kerdene. Mesela tena PKK nîya. Kurdî ça de çîyêk bi dest bifînê, raştê hêrişanê dewleta Tirkan yenê. Mesela PKK ney dişmenitîya Kurdan a. Dewleta Tirkan wazena pêro Kurdî wa ci rê bîat bikerê.”
 
‘YNK tawîz nêdano’
Hesenî va, “YNK demêko derg ra nata hetê dewleta Tirkan ra yeno tehtîdkerdiş. Şarê Silêmanîye hêrişanê dewleta Tirkan qebûl nêkeno. YNK zî îşxalê dewleta Tirkan qebûl nêkeno. Vera Silêmanîye hetê dewleta Tirkan ra ambargoyî dewam kenê la YNK tawîz nêdano. Demêk verê cû Bafil Talabanîyî bernameyêk de va, ‘Mam Celalî çîyêko winasî nêkerdo, ma senî eşkenê bikerê’. Şarê Silêmanîye paştî nêdano dewleta Tirkan û amade yo ke bedel bido.” (MA) 

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.