Mezelanê Ugur Kaymaz û pîyê ci rê hêrişêka bîne ameye kerdene

MA / Ahmet KANBAL / MÊRDÎN

Çend rojî verî cû mezelanê Ugur Kaymaz û pîyê ci rê hêrişêke ameybî kerdene û mezalanê ci rê hêrişêka bîne ameya kerdene.

Ugur Kaymaz o 12 serre û pîyê ci Akmet Kaymaz, 21ê Teşrîna Peyêne 2004î de Mêrdîn Qoser de verê keyeyê înan de ameyê qetilkerdiş. Ugur Kaymaz o 12 serre, bi 13 guleyan ame qetilkerdiş. Çend rojî verî cû mezelanê înan rê hêrişe ameye kerdene û berkoleyê mezela Ahmet Kaymazî ame şikitene. Berboleyê Mezele amebi viraştene û xebere dîyaybî keyeyî.

Berkoleyê mezele reyna şikîya

Ameyodîyarkerdiş ke hêrişa verêne ra dima hêrişêka bîne ameya kerdene. Welatîyan ra Mustafa Polatî dîyar kerd ke o wexto ke şîyo mezelca, dîyo ke berkoleyê Ahmet Kaymazî reyna ameyo şikitene.

‘Mezela ci de rehet verdê’

Polatî dîyar kerd ke badê viraştişê berkoleyî medyaya sosyale ser ra pare kerdo û va, “Herhal zorê tayînan şîyo. Roja bîne berkole reyna ameyo şikitene. 13 guleyî nîyayê domanê 12 serreyî, no bes nêkerdo 19 serrî vîyartê mezeli yenê şikitene û mezele de zî rehet nêverdenê.”

Polatî dîyar kerd ke serrê Ugur û ey eynî yê û va, “Ez 15 serrî bîya Ugurî ra xebera mi bî. Ez hema 2 serrî bîya keyeyê ma bar kerdo Îstanbûl û ez uca de pîl bîya. Qetilbîyayîşê Ugurî mi ser de zaf tesîr kerd. Wexto ke ez nameyê ey eşnawena ez bena xemgîn û ez zaf hêrs bena. Qetil kenê û qasê qama ci çekêk verê ey de nanê ro û wazenê nîçê pêkewtişê bidê ci.”

‘Ma wayîrê erjanê xo bivejîyê’

Polatî şarî rê gazîya wayîrvejîyayîşî kerde û va, “Tîya de hêrişêka dîyine yena kerdene û kesî ra vengêk nêvejîyeno. Ez do berkoleyî reyna virazî. Eke ma nêşkenê berkoleyêk zî bipawê, ma ganî muhakemeyê tayê çîyan bikerê.”