Pîr Seyîd Riza û embazê ci do bêrê yadkerdene

Pîr Seyîd Riza û embazê ci do serrgêra 85ine ya dardekerdişî de bêrê yadkerdene.

85 serrî verî cû rayberanê Dêrsimî ra Seyîd Riza û embazê ci Wusênê Seydî, Elîyê Mirzê Silî, Hesen Axa, Findiq Axa, Reşik Uşên û Hesenê Îvraîmî, Meydanê Genimî yê Xarpêtî de ameyê dardekerdiş. Cayê mezela Seyîd Riza û embazanê ci nîno zanitene. Seyîd Riza û embazê ci do xeylê cayan de bêrê yadkerdene.

Hema zî hesabê Terteleyê 37 û 38î nêameyo dayene. Dêrsimijî 85 serran ra nat gêrenê cayê mezelanê seyîd û merdimanê xo.

‘Ma çîyêkî xo vîr ra nêkerdo’

Emser zî do seba yadkerdişî xeylê bernameyî bêrê viraştene. Federasyonê Komeleyanê Dêrsimî eşkera kerdo ke, do 15ê Teşrîna Peyêne de saate 19.37î de Kadikoy Rixtimî de yadkerdişêk bikero.

Komeleya Dêrsimijan a Enqerayî zî dîyar kerd ke do bernameyê yadkerdişî bêrê viraştene. Hetê komeleye ra do 15ê Teşrîna Peyêne de saete 18.00î de Eywana Kombîyayîşî ya Tum Bel-senî de bernameyê yadkerdişî bêro viraştene.

PÎRHA