Raporê erjê demokrasîyî: Tirkîya, serdestîya hiqûqî de dora 148ine de ya

Goreyê erjnayîşanê sazîyanê mîyannetewîyan Tirkîya, derdestîya hiqûqî de mîyanê 173 welatan de dora 148ine de ya.

Goreyê raporê Rewşa Demokrasî ya Globalî yê International IDEAyî yê 2023yî, Tirkîya warê serdestîya hiqûqî de mabênê 173 welatan de dora 148ine de ya. Tirkîya mîyanê welatanê Ewrûpa ra Rûsya ra zî têpîya ya û tena Belarûs ra ver a.

Rapor, goreyê erjanê 2022yî ameyo hedrekerdiş. Rapor, emser 4 erjan ser ra erjanê demokrasîyî analîz keno. Nê erjî: Serdestîya hiqûqî, heqî, temsîlîyet û beşdarîye yê.

Kategorîya serdestîya hiqûqî de Tirkîya 173 welatan mîyan de dora 148ine de ya. Ewrûpa de zî na kategori de 45 welatan mîyan de dora 44ine de ya. Na kategori de welatê tewr başî bi dore Danîmarka, Norveç, Almanya, Swîsre û Swêd ê.

Tirkîya her warî de têpîya ya

Kategorîya heqan de Tirkîya dinya de dora 129ine û Ewrûpa de zî dora 42yine de ya. Na kategorî de zî Danîmarka dora yewine de ya û dima zî Almanya û Swêd yenê. 

Kategorîya temsîlîyetî de Tirkîya dinya de dora 112ine de ya û Ewrûpa de zî reyna dora 42yine de ya. Na kategori de dora yewine de Swêd ca gêno. Kategorîya beşdarîye de zî Tirk3iya dinya de dora 139ine de ya û Ewrûpa de dora 42yine de ya. Na kategorî de welatê tewr başî Danîmarka, Fînlandîya û Îrlanda yê.

YENÎ YAŞAM