Taşçier: Destvisteyê Kurdan hedef de yê

• Parlamenterê HDPyî yê Amedî Îmam Taşçierî dîyar kerd ke, bi hêrîşanê Bakur û Rojhelatê Sûrîyeyî destvisteyê Kurdan hedef gêrîyenê.

Hêrîşê ke hetê Tirkîya ra vera Bakur û Rojhelatê Sûrîyeyî 20ê Teşrîna Peyêne ra nat benê dewam kenê. Hêrîşanê hewa û erdî de wendegeh û nêweşxaneyî zî hedef gêrîyayê. Parlamenterê HDPyî yê Amedî Îmam Taşçierî nê hêrîşî erjnayê.

Hedef destvisteyê Kurdan ê

Îmam Taşçierî va, “Tirkîya bin ê hêrîşanê xo Sûrîyeyî zî îşxal kena. Senî ke Efrîn ame îşxalkerdiş, wazena Kobanî û Minbicî zî îşxal bikera. Hedefê Tirkîya no yo ke, wa Kurdî mebê wayîrê statuyêk û erdê xo ser de azad mecuwîyê. Kurdî Antarktîka de zî bibê wayîrê statuyêk, AKP-MHP do hêrîşê ucayî zî bikerê. Dişmenetîya winasî esta. Îqtîdar Kurdan ra vano ‘yan şima binê hukmê mi de manenê yan zî şima rê heqê cuye çin o’. Ewro Kurdistan de çeke ke bi muqaveleyan ameyê qedexekerdiş yenê gurînayîş. Sûcê şerî yenê kerdene. Amerîka û Rusya Rojava de yê. La nê hêzan ra zî veng nêvejîyeno. Ganî vera nê hêrîşan vinderê.”

Gazîya yewîtîye

Taşçierî gazîya yewîtîye kerde û va, “Kurdî ça de benê wa bibê, ganî vera nê hêrîşan vinderê. Heta ke Kurdî mebê yew do nê hêrîşî tim dewam bikerê. Wa kes mevajo şer ma ra dûrî yo. Adiro ke ewro ucayî vêşneno, meşte do tîyayî bivêşno. No şer zirar dano demokrasî û ekonomîyî zî. Coka ganî pêroyê haştîwazî vera nê şerî vinderê.”