Tîyatroyê Kurdkî têgêreno ke pay ra bimano

• Nuştoxê kayê Kuçikê Stalînî Zinar Atamanî va, “Problemê sereke yê tîyatroyê Kurdkî ekonomîk nîyo, wazeno pay ra bimano. Ma wazene bi azad her ca de kayanê xo kay bikerê.”

ZEMO AGGOZ / MA / ENQERA

Kayê Kuçikê Stalînî yo ke hetê ekîba Alan Theatreyî ra ameyo hedrekerdiş do 18ê Çeleyî de Enqera de bêro kaykerdene. Kay hetê Zinar Atamanî ra ameyo nuştene û hetê ey ra zî yeno kaykerdene. Kay çimê Kutikêkî ra behsê Kurdanê ke Kurdistanê Sûrî ra surgunê Asyaya Mîyanenî bîyê û wexşetê şerê cîhanî yê 2yînî keno. 

‘Armancê ma yo sereke payramendiş o’

Atamanî derheqê tîtaroyê Kurdkî de va, “Problemê sereke yê tîyatroyê Kurdkî ekonomîk nîyo, payramendiş û xo rê caakerdiş o. Ma nêşkenê her ca de kayanê xo kay bikerê. Serra pare bi qedexeyan vîyerte. Ma nêşkenê bi azad bi ziwanê xo û kulturê xo bivejîyê sehneyî ser. Ma wazenê bê tedaya dewlete vejîyê sehneyî ser. Nika tîyatroyê Kurdkî, hunerê Kurdkî û heta sîyasetê Kurdkî têgêrenê ke pay ra bimanê.”

Muhîmîya tarîx, kultur û ziwanî

Atamanî va, “Ma hem bi kayanê xo edebîyatêk munenê hem behsê tarîxêk kenê û kayanê xo bi Kurdkî nusenê. Ziwano ke serran ra nat raştê asîmîlasyonî yeno. Seba ke ziwan aver de şêro û bêro pawitene, ez bawer kena ke tîyatro rayîrêko zaf muhîm o. Coka ganî her wext paştî bidîya tîyatroyî.”

Qeyyûman ra dima

Atamanî peynî de va, “Ganî timûtim paştî bidîya tîyatroyê Kurdkî û va, “Mi kayê xo yê ‘Di tûwaletê de’yî Sehneyê Şanoya Bajarî yê Beledîyeya Amedî de bi paştîdayîşî kaykerdibi. La nika qeyyûmî ver kayê Kurdkî nînê kaykerdene û ez nêşkena kayê xo kaybikerî. Beledîyeyê ke qeyyûmî erzîyeyê ser de rewşe nîya ya. Sazîyê ke bi îradeyê şarî awan bîyê, ganî reyna bibê yê şarî. Tîyatroyê Kurdkî zaf paştî nêgenê. Bi zorîye dest nîyayo sazîyan û beledîyeyanê ma ser. Temaşekerdoxî tim paştî danê ma. Kayî Kurdkî bibê, temaşekerdoxî hîna zêde paştî danê ma.”

Atamanî, seba 18ê Çeleyî temaşekerdoxî silaynayê.