32 serran ra nat nêşkena şêra dewa xo

• Tole Degere va, “Ez 32 serran ra nat nêşkena şêrî dewa xo. Dewa mi zaf kewana mi vîrî. Cayêk sey erdê kesî nîyo.”

Dewê Kurdan serranê 90yan de bi nameyê ‘ewlehîye’ ameyê vengkerdiş û xeylê dewî zî ameyê vêşnayîş Dewa Sîlopîya ya Bîlîkan zî nê dewan ra yew a. 32 serran ra nat şîyayîşê na dewe qedexe yo. Dewijî her serre waştişnameyan nusenê ke şêrê dewa xo û bi rojan seba destûrî pawenê. Mezraya Bîlîkanî de hetê qorîcîyan ra darî yenê birnayîş. Tole Degere 23 serrîya xo de dewa x ora vejîyaya û nika 55 serrî ya. Tole Degere wazena qedexe bêro wedartiş. 6 domananê aye zî hema dewa xo nêdîya.

‘Ma nêzanitêne zehmetî çi ya’

Tole Degere va, “Dewa ma de problemêk çin bi la ma dewe ra ameyê vetiş. Cuya ma ya dewe weşe bî. Ma rence kerdêne û kêmasîya ma çin bî. Ma ten abi pereyan domananê xo rê kincî hêrînayêne. La dima ma dewanê x ora ameyê vetiş û ma ameyê bajaran. Nika zî ma nêşkenê agêrê dewanê xo. Çir ama nêşkenê şêrê dewa xo? Ê çira ma dewamê ma ra mehrûm verdenê.”

‘Herinda birnayîşî de awe bidê’

Dayîka Degere va, “Seba ke ma bieşkê şêrê dewa xo, ma destûr genê. No nîno qebulkerdiş. Nika zî daranê ma yê êncîr û alincan birnenê. Ma bi xo rayîrê dewa xo viraşt. Dewlete ma rê rayîr zî nêviraşt. La nêverdena ez şêrî dewa xo. 32 serran ra nat ez nêşîya dewa xo. Ma ameyê bajar la tehdayê dewlete nêqedîyayê. Hem destûr nêdanê ma hem zî daranê ma birnenê. Wa herinda birnayîşî de awe bidê. Wa na bêhiqûqîye biqedîya.”

‘Bawerîya mi çin a’

Tole değere peynî de va, “Keyeyê mi zaf qijkek o. Dewe zaf kewena mi vîrî. Cayêk sey erdê kesî nîyo. Cuya mi tîya de mîyanê çend metreyan de vîyerena. Dewe de ez eşkayêne manga û mêşnayan weye bikerê. Ez tîya de nêşkena çîyêk bikerî. Mezelê kalikanê ma zî dewe de yê. Ma nêşkenê roşanan de zî şêrê dewa xo. Şima roje de 7 rey destûr biwazê zî nêdanê. Dewa ma de probleme ewlehîye çin bi. Bawerîya mi çin a ke ez bieşka agêra dewa xo û sey wextanê verênan bicuwîya.”

MA / ŞIRNEX