- Seba dersa weçînitî ya Kurdkî bi hezaran wendekaran muracat kerd la 12 serrî de tena 132 mamostayî ameyê tayînkerdiş.
Çalakîyê ziwanê dayike dewam kenê. Yeno waştene ke wa Kurdkî bibo ziwano resmî û ziwanê perwerdeyî. Kurdkî sey dersa weçînitî yena dayene la mamosteyî nînê yayînkerdene. Goreyê malumatan, heta nika 132 mamostayê Kurdkî ameyê tayînkerdene.
2022-2023î de 24 hezar û 368 wendekaran dersa Kurdkî tercîh kerd. Hîna nîno zanayene ke emser çend wendekaran dersa Kurdkî tercîh kerda. Yeno dîyarkerdiş ke goreyê hûmara wendekaran hûmara mamostayanê Kurdkî xeylê kêmî ya.
Polîtîkayê asîmîlasyonî
Verfekê Înîsîyatîfê Mamosteyanê Kurdkî Emîn Ayî dîyar kerd ke Kurdkî bi resmî nîna qebûlkerdene û va, “Şima nêşkenê ervaqêkî resmî bi Kurdkî binusê. Kurdkî, parlamento de nîna qebûlkerdene. Tîyatro û konserî yenê qedexekerdene. Polîtîkayê asîmîlasyonî yenê ramitene. Vera nê polîtîkayan xoverdayîşêk yeno ramitene. No xoverdayîş zî huner, kultur û ziwanî hêzdar keno.”
‘Keyeyî yenê astengkerdene’
Ayî va, “Goreyê malumatanê ke kewtê destê ma mabênê 2012 û 2023yî de 120 mamostayê Kurdkî ameyê tayînkerdene. Xeylê nê mamostayan beşa xo bedilnaye. Nika 79 mamostayê Kurdkî mendê. Xeylê sebebê na rewşe est ê. Keyeyî eleqa nêmojnenê û sîyaset giranî nêdano na mesele. Heto bîn ra zî îdareyê mekteban formanê dersan nêdanê keyeyan. Wexto ke danê zî tayê dersan weçînenê hîna danê. Mamostayî vera na rewşe vengê xo berz nêkenê.”
Waştişê perwerdeyê Kurdkî
Emîn Ayî peynî de va, “Ganî partîyî, sazgehê kultur û hunerî, çapemenî û sendîkayî bibê yew. Ma ganî derheqê perwerdeyê bi ziwanê dayike de waştişê xo bi vengêko berz vajê. No do prestîjê ziwanî berz bikero. Seba ke ziwanêk aver de şêro ganî domanî bi ê ziwanî perwrde bigerê. Hefte de 2 saetî zaf tay o. Ma eşkenê bi wayîrvejîyayîşê ziwanê pêro hêrişan pûç bikerê. Ma ganî her warê cuya xo de Kurdkî bigurînê.”MA / Zeynep DURGUT / ŞIRNEX
