- Encamnameyê kombîyayîşê Platformê Paştîdayîş û Pawitişê Bajarî yê Amedî ame eşkerakerdene.
Serekîya Platformê Pşatîdayîş û Pawitişê Bajarî yê Amedî ra 24ê Sibate de kombîyayîşê “Seba çareserîya meseleya Kurdan têhetameyîşê komelê sivîlî” ame kerdene. Encamnemeyê kombîyayîşî ame eşkerakerdene.
Meseleya Kurdan meseleya bingeyî ya
Encamname de ame dîyarkerdiş ke meseleya Kurdan ronayîşê Cumhûrîyetî ra nata est a û 40 serranê pêyênan de zî bi şerî dewam kerd a. Ame dîyarkerdiş ke bingeyê xeylê probleman de meseleya Kurdan est a û bi polîtîkayanê şerî nîna çereserkerdene.
Problemê ke nêçareserîye ver peyda benê
Problemê ke nêçereserîye ver peyda bîyê, bi nê sernameyan ameyê rêzkerdene:
*Vera ziwanê Kurdkî hema zî polîtîkayê asîmîlasyonî dewam kenê, Çalakîyê Kurdkî yenê qedexekerdene, astengîyê qanûnî yê ke vernîya Kurdkî gênê dewam kenê.
*Operasyonanê eskerîyan ver texrîbato ekolojîk peyda beno, xoza talan bena û seba rantî yena qirkerdene.
*Netîceya pirodayîşê wesayîtanê zirxinan domanî merde û hema zî seba faîlan polîtîkaya bêcezaverdişî dewam kena.
*Hema zî destpanênayîşê parlamenteran yeno wedartene û yenê girewtene. Polîtîkaya qeyûman û dewayê panayîşê partîyan dewam kenê. Muqaveleyê mîyanneteweyî yenê binpaykerdene.
*2015-2016î ra dima şer reyna zêdîya, mergî zêdîyayê û heqê bingeyî ameyê binpaykerdene. Şîdetê vera cinîyan zêdîyayo.
*Hiqûq derheqê meseleya Kurdan de wayîrê pratîkê xirabî yo. Partîyê sîyasî krîmînalîze benê û cezayî giranî dîyenê endamanê partîyan. Hepisxaneyan de heqê bingeyî yenê binpaykerdene. Heqê pêvînayîşan yenê binpaykerdene û polîtîkaya tecrîdî yena ramitene.
Pêşnîyazî
*Seba çareserîya meseleya Kurdan îradeyê çareserîye rê îhtîyacîye est a û ganî şer bêro vindertene.
*Seba ke çareserîya mayînde bêra awankerdene ganî vernîya aktoran ra astengîyî bêrê wedartene û îmkanî bêrê peydakerdene.
*Meseleya Kurdan, bingeyê problemanê hiqûq, demokrasî û ekonomî ya. Ganî partîyê sîyasî na raştîye fam bikerê û goreyê na raştîye têbigêrê.
*Seba çareserîye ganî paştî bidîya xebatanê rêxistinanê komelê sivîlî û xebatanê têkildaran.
*Seba çareserîya meseleyanê komelkîyan Qanûnê Bingeyî yê neweyî rê îhtîyacîye est a û hedrekerdişê ci de ganî pêro cîhetî cayê xo bigerê.
Ma do çerçewaya nê pêşnîyazan de heyetêk awan bikerê û bi pêvînayîşan xebatanê xo biramnê.” MA / AMED
