Almanya de raşgirîya radikale her ke şino xurt bena. Bitaybetî AfD (Seba Almanya Partîya Alternatîfe) teberkerdişê koçberan wazeno. Xeylêk çalakîkerî vera na partî nêrazîbîyayîşê xo mojnenê.
Xeylêk şaristananê Almanya de çalakîkerî vera xurtbîyayîşê AfDyî vejîyayî kuçeyan û waşt ke wa AfD bêro qedexekerdene.
Dima ke planê teberkerdişê koçberan ê sîyasetmedaranê AfDyî eşkera bîyê nêrazîbîyayîşî zêdîyayî. Vizêr nawnayîşanê şermezarkerdişî yê Berlin Leipzigî de û temamîya Almanya de bi des hezaran kesî vera AfDyî vejîyayî waran.
Koln de qasê 30 hezar kesî tewrê çalakîye bîyî û înan bi pankartanê xo waşt ke wa AfD bêro qefilnayene û qedexekerdene. Sosyalîstî, komê xirîstîyanî zî tewrê çalakîye bîyî. Girseyî vera sloganê sey ‘Ma yewreng ê’, ‘AfD serkêşê faşîzmî yo’, ‘Nazîyî nimitkî ra kebab wenê’ vatî.
Hannover de zî 8 hezar û 500 kesî vejîyayî waran û înan yew fekî ra vat ‘Temamîya Hannoverî AfD ra aciz a.’
Schwerin û Wurzburg de zî bi hezaran kesî kom bîyî. Wurzburg de ciwanan serkêşîya çalakîye kerde û pankarta ‘Nefret alternatîfêk çin o’ akerde.
Şanê dişemeyî zî Essen de qasê 7 hezar kesî vera AfDyî vejîyayî waran û veng da ke vera raştgîrîya radîkale paştdayîş wa bêro xurtkerdene.
Wina pawîyeno ke Almanya de no hewte zî çalakîyî do dewam bikerê.
XWEBÛN
parvê bike
Nûçeyên ku dikare bala we bikşîne
