Hedreyîyê Festîvalê Fîlmanê Kurdan dewam kenê

Festîvalê Fîlmanê Kurdan ê 14inî do mabênê 22-26ê Teşrîna Peyêne de Hamburg de bi ramojnayîşê 19 fîlman bêro viraştene.

Festîvalê Fîlmanê Kurdan ê 14inî do bajarê Hamburgî yê Almanya de mabênê 22-26ê Teşrîna Peyêne de bêro viraştene. Festîval de do Kurdistan û dinya ra 19 fîlmê Kurdan bêrê ramojnayene.

Endamê Komîteya Organîzasyonî Rewend Cewadî dîyar kerd ke mabênê 125 fîlman ra 19 fîlmî ameyê weçînayene. Nînan ra 6 hebî dokümanter ê, 4 hebî fîlmê metraj derg ê û 9 hebî zî fîlmê kilm ê. 

Festîval do bi 22yê Teşrîna Peyêne de bi fîlmê ‘Gava Şitil Mezin Dibin’ dest pêbikero. Tedeyîya festîvalî de do 2 semînerî zî bêrê dayene. Hetê hunermendê Rojavayijî Luqman Ehmedî ra do babeta sînema de fotograf de semînerêk bêro dayene û ziwanê Kurdkî ser o zî do hetê Kawa Nemirî ra semînerêk bêro dayene. Festîval de do 3 xelatî bêrê dayene.

Derheqê muhîmîya festîvalî de Cewadî va, “Festîvalê fîlmanê Kurdan, seba ke hunerê Kurdan aver de şêro ûdinya de bidîyo şinasnayene zaf muhîm ê. Ganî hîna zêde xebatî bêrê kerdene.”

YENÎ YAŞAM