- ANKA-DERî de qeydê kursê Kurdkî, resim û muzîkî dest pêkerdê.
Komeleya ziwan, kultur û hunerî ANKA-DER, 2022yî ra nata xebatanê xo Enqera de ramnena. Komeleye de qeydê kursê Kurdkî yê dewrê neweyî dest pêkerdê. Kursî Kurmanckî, Kirmanckî û Sorankî do bêrê dayene. Sewbîna zî do kursê muzîk û resimî zî bêrê dayene. Dersî do 20ê Sibate de dest pêbikerê.
‘Wa şarê ma wayîrê ziwanê xo bivejîyo’
Mamostayanê komeleye ra Umît Bozanî dîyar kerd ke ê wazenê vernîya asîmîlasyonî bigerê û va, “Wa şarê ma bêro biwanê xo bimuso. Êyê ke zanê wa ziwanê xo hîna aver de berê. Eke perwerde mebo, ziwan vera-vera têpîya şino. Zaanyîş tena qiseykerdiş nîyo. Ganî wendiş û nuştişî zî bibê. Wa şarê ma wayîrê ziwanê xo bivejîyo. Ma tena Kurmanckî ney kursanê Kirmanckî û Sorankî zî danê. Kesê ke Kurmanckî zanê eşkenê Kirmanckî û Sorankî bimusê. Pêroyî ziwanê ma yê. Her lehçe lehçeya ma ya.” MA / ENQERE
