- Merkezê Cigêrayîşanê Warî yê Sosyo Polîtîkî anketêk viraşt û meseleya Kurdan sey meseleya tewr bingeyî ameye dîyarkerdiş.
Merkezê Cigêrayîşanê Warî yê Sosyo Polîtîkî derheqê meseleyanê bingeyînan de xebata anketî kerde. Zêdeyêya beşdaran dîyar kerd ke meseleyê tewr bingeyî ‘Meseleya Kurdan’, ‘Krîzo ekonomîk’ û ‘Çinbîyayîşê demokrasîyî’ yê.
Bajaranê sey Îstanbûl, Enqera, Izmîr, Bûrsa, Amed, Mêrdîn, Qers, Wan û pêro pîya 18 bajaran de bi online aktek ame viraştene û 765 kesî beşdar bîyê. Anket mabênê 29ê Kanûne û 18ê Çeleyî de ame viraştene. Beşdaran, cuya xo de tewr kêmî reyêk raya xo daya partîyanê Kurdan.
Meseleya tewr bingeyî meseleya Kurdan a
Beşdaran rê ame perskerdiş ke ‘Goreyê şima Tirkîya de meseleya tewr muhîm çi ya?’ û se ra 54,7ê beşdaran vato “Meseleya Kurdan”, se ra 13yê beşdaran vato “Krîzo ekonomîk” û se ra 8,1ê beşdaran zî vato “Çinbîyayîşê demokrasîyî” yo.
Çareserîya meseleya Kurdan: Dîyalog û muzakere
Se ra 28,2yê beşdaran vato meseleya Kurdan bi “Dîalog û muzakereyî”, se ra 20,3yê beşdaran vato bi “Haştîyêka birûmete û mayînde” û se ra 15,3yê beşdaran zî vato bi “Qanûnê Bingeyî yê demokratîkî” yena çareserkerdiş.
Beşdarî Abdullah Ocalanî sey hêza çareserîye vînenê
Grûba ke serra înan mabênê 18-24 û 25-34î yê seba çareserîye Serekê PKKyî Abdullah Ocalan û Komara Tirkîya nîşan danê û se ra 27,1ê beşdaran vato meseleya Kurdan mabênê Abdullah Ocalan û dewlete de yena çareserkerdene.
Peynî de ameyo waştene ke wa beşdarî rewşa demokrasîya Tirkîya bierjnê. Se ra 69,9ê beşdaran vato demokrasîyê Tirkîya “Zaf xirab o”. MA / AMED
