Aydar: Tirkîya wazena Lozanî aktive bikera la na kedêka veng a

Nûçeyên Diaspora

pêncşem 28 tîrmehê 2022 - 16:16

  • Endamê Konseya KCKyî Zubeyîr Aydarî va, “Tirkîya nê prosesî de wazena satatuyê Lozanî newe ra awan bikera la keda ci kedêka veng a.”

Serrgêra 99ine ya Muqaveleyê Lozanî de 57 partî, dezge, hunermend, sîyasetmedar, roşnvîr û akademîsyenê Kurdan Lozan de ameyê pêser û tîya de konferansêk ame viraştene. Badê konferansî netîceyî ameyê weşanayîş. Netîceya konferansî de Kurdan va wazenê Kurdan se na serrî bêstatu verdê la ma do destûr medê înan.

Beşdaranê konferansê Lozanî ra endamê Konseya KCKyî Zubeyîr Aydarî derheqê konferansî de qisey kerd.

‘Lozan seba şaran belgeyê qirkerdişî yo’

Endamê Konseya KCKyî Zubeyîr Aydarî va, “100 serrî verî cû Lozan de konferansêk virazîya û ameyoxê Kurdan bi destê înan ame dîyarkerdiş. Konferansî de temsîlkarê Kurdan çin bî. Bi destê Îngîlîz û Kemalîstan şîyayîşê înan ame astengkerdiş. Kurdî nêşkayê beşdarê konferansî bibê. Kurdistan bi çar lete û dima zî ame înkarkerdiş. Dewletanê hêzdaran va şima eşkenê Kurdan qirbikerê. Lozan esasê xo de seba Kurdan belgeyê jenosîdî yo. Ermenî û Sûryanîyî zî raştê eynî çîyan ameyê. Nê şarî verê cû raştê qirkerdişan ameybî la bi Lozanî nê qetlîamî testîq bîyê.

Vateyê Kurdan

Aydarî derheqê viraştişê konferansî de va, “Kurdî bi nê konferansî vera Muqaveleyê Lozanî cayê xo dîyar kenê û vateyê xo vanê. Kurdî dewletanê îmzakaran rê vanê, “Ma 100 serrî verî cû çin bî la ma nika tîya de yê, şima nêşkayê ma qir bikerê, ma letebîyayîşê welatê xo û qirkerdişan qebul nêkenê. Aye ra ma Lozanî nêşinasnenê”.
‘Kurdî, Kurdê verênî nîyê’

Zubeyîr Aydarî derheqê rewşa rojaneye de va, “Kurdan bi xoverdayîşê xo statuyê Lozanî qule kerdo la no statu bi temamî nêwedarîyayo. Kurdî ewro Başûrî de wayîrê federasyonî, Rojavayî de wayîrê cayêkî azadî, Bakur û Rojhelatî de wayîrê xoverdayîş û hêzêka pîl ê. Nê destvisteyê ma hedefe Erdoganî de yê. Tirkîya wazena her ca de destvisteyanê Kurdan çin bikera. Tirkîya wazena Lozanî newe ra awan bikera. Dîplomasîya Tirkîya vera Kurdan yena ramitene. La na keda Tirkîya kedêka veng a. Çimkî Kurdî hinî wayîrê tecrubeyan ê. Kurdî, Kurdê verênî nîyê. Hes nêşkeno Kurdan Lozanî rê mecbûr verdo.”

Kurdan reyde şerkerdiş bi sebebê krîzanê pîlan

Aydarî va, “Polîtîkaya Tirkîya ya vera Kurdan, Tirkîya de bi sebebê krîzanê ekonomîk, sîyasî û komelkîyan. Badê xeripîyayîşê prosesê çareserkerdişî, rewşa Tirkîya bî xirabe. 7 serran de ekonomîyê Tirkîya qedîya. Sebebê ci vera Kurdan şerkerdiş o. Pêro çimeyê ekonomîyî şerî rê ameyê xerckerdiş. Serek Ocalanî vatibi eke prosesê çareserîye biqedîyo do rewşe biba xirabe. Vateyê ey vejîyayê. 2015î de prosesê çareserîye ame qedînayîş û Tirkîya 24ê Temûze serdêra Lozanî de qerarê şerî da. Ma ewro rastîya şerî vînenê.”

Heta 2023yî çalakîyî

Endamê Konseya KCKyî Zubeyîr Aydarî peynî de va, “Ma konferansî de qerar girewt ke, ma do organîzekerdişê partî û dezgeyan heta 24ê Temûze 2023yî xeylê çalakîyan bivirazê. Ma do bi konferas, kombîyayîş û mîtîngan Lozanî puç bikerê.”

MERKEZÊ XEBERAN

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.