Serrgêra Lozanî de yewîya neteweyîye hewce kena’

Hemsereka Koordînasyonê Êzidîyan ê Ewropa Çîçek Yildize derheqê Peymana Lozanî û refdarê kurdan de ANFyî rê qisey kerd.

Hemsereka Koordînasyonê Êzidîyan ê Ewropa Çîçek Yildize ard ziwan ke serrgêra Peymana Lozanî de ganî yo ke kurdî vera îşxalkeran bi yewîya neteweyîye têbigêrê.

Yildize vist vîrî ke Kurdistan bi Peymana Lozanî çar parçe bîyo û qirkerdişê kurdan dest pêkerd. Aye pare kerd ke Peymana Lozanî îmhaya kurdan kerda armanc û bawerîyê bînî zî çin hesibnayê.

Yildize vat: “Kurdan û kurdanê êzidîyan qetî na peymane qebul nêkerde û tim xo ver da. Xêrê nê xoverdayîşan ra zî ma eşkayê nasnameyê xo bipawê. Dewleta tirke kerd ke bi zorbazî, qirkerdiş û hêrişan komel, dîn û ziwananê bînan çin bikera. Komelê ma pê xoverdayîşê xo verê ney girewt. Peymana Lozanî ra dima na seserre de sey Dêrsim, Koçgirî û Gelîya Zîlane xeylêk qirkerdişî ameyî kerdene. Xoverdayîşê sey Seyîd Rizayî, Şêx Seîdî û Agirîyî zî seba ke kurdî yew nêbê ameyî tasfîyekerdene. 50 serranê peyênan de kurdî serkêşîya Rayber Apoyî û têgêrayîşê azadîye de xo ver danê. Coka dewlete nêeşkaye qirkerdişê kurdan bi netîce bikera.”

Yildize da zanayene ke 22-23yê temmuze de Lozan de bi beşdarîya xeylêk rêxistin û dezgehanê kurdan konferansêk do bêro kerdene û êzidîyî zî do nê konferansî de cabigêrê. Yildize vat: “Nê konferansî de ganî ma yewîya neteweyîye ser o nîqaşan bikerê. Yewîya neteweyîye ganî biba meseleya kurdan a verêne. Ganî ma vera îşxalkeran bi yewîya xo xo ver bidê.”

Yildize îfade kerd ke sîyasetê înkar û îmha yê Peymana Lozanî dewam keno. Aye seba ke yewîya neteweyîye ra dûrî vindeno PDK rexne kerd û vat: “Ewro heyf ke hêrişê îşxalî yê vera Başûrî hetê PDKyî ra yenê paştîdayene. PDK vera nê hêrişan tewir nêgêno. PDK îtîfaqê neteweyî ra zî dûrî vindeno. No nêno qebulkerdene.”

XWEBÛN