Bê Gulîstane hezar û 465 rojî

Wendekara Unîversîteya Munzurî Gulîstan Dokuya 21 serrî 5ê çeleyê 2020î de Dêrsim de bi hewayêkê şikdarî vînî bîye. La cigêrayîşan de tu şopê Gul3istane nêame dîyîş.

Serê qetilkerdişê Gulîstan Dokuye ra 4 serrî derbaz bîyî û seba şikdar bêrî dîyîş û muhakemekerdişî têkoşînêko gird dîya. Bedrîye Dokuya ke têkoşînê kênaya xo bi israr dewam kena, serra 4. de vengê ‘Kênaya mi bivînê’ kerd.

Wendekara Unîversîteya Munzurî Gulîstan Dokuya 21 serrî 5ê çeleyê 2020î de Dêrsim de bi hawayêkê şikdarî vînî bîye. Vera îxtîmalo ke Gulîstane kewta awe, Çemê Mûnzûrî de xebatê cigêrayîşî ameyî kerdiş; la cigêrayîşan de tu şopê Gulîstane nêame dîyîş. Vera heme waştiş û rexneyê keye û avûkatan zî cigêrayîşê Gulîstane yê çolî nêame kerdiş, selahîyetdaranê dewlete zî bi îdîayê “awe de ya” tehqîqat bi baldarî rayîr ra nêberd. Xebatê semedê dîyîşê Gulîstane 6ê temmuza 2020î de ameyî vindarnayîş.

Vînîbîyayîşê şikinî yê Gulîstane de polîsan bi zanayîş fehmê ‘xo kişta’ awan kerd. Nê prosesî de vejîya raşte ke pîyê şikdarê yewinî Zaînal Abarakovî polîs Engîn Yucel o.

Walî Tuncay Sonel, Mudirê ÎŞKURî yê Tunceliyî O.A û xebatkarê Walîtîye F.Gyî keyeyê Gulîstane ser o teda kerde ke çapemenîye rê qisey nêkerî.

Keyeyî şî bi Anqara

23yê çeleyê 2022yî de keyeyê Gulîstane şî Anqara û bi waştişê Wezîrîya Edaletî pêvînayîş bikera şî verê Wezîrîye û polîsan hêrişê vera keyeyî kerd. Dima ra Wezîrê Karanê Zerreyî yê o wextî Suleyman Soyluyî serê hesabê xo yê Twîtterî ra eşkerayî daye û vat ke seba dîyîşê Gulîstane bi samîmîyet cehd kenê û partîyê muxalefetî yê ke na babete arde rojeve zî bi sûcdarîya ‘rantê sîyasî’ sûcdar kerdî.

Cinî Gulistane persenê
Vera heme qewimîyayîşan, rêxistinê cinîyan ê Kurdistan û Tirkîya, bi taybetî rêxistinê cinîyan ê Dêrsimî, seba musayîşê aqubetê Gulîstane xeylê çalakî kerdî.
Çalakîyan de ge ge raştê hêrişê polîsan ameyî la cinîyan mîyanê 4 serran de qet fek persayîşê persê “Gulîstan Dokuye kam ca de ya?” nêverda. Vera her çîyî selahîyetdaran ra game nêameye eştiş.

Heme çî Abarakovî nîşan danê

Rixmê heme delîlan hukm û îqtîdar vera waştişê edaletî de bêveng mend. Zaînal Abarakovo ke 17ê adara 2022yî de Alanya de ame destbendkerdiş, bi qedexeyê tebervejîyayîşê welatî serbest veradîya. Sewbîna 18ê adara 2022yî de ame eşkerakerdiş ke Zaînal Abarakov 6 aşmî nêşîyo îmze û ganî şertê kontrolê qanûnî îmze bikerdêne.

‘Kênaya mi bivînê’

Bedrîye Dokuye vat ke waştişê aye yo yewin no yo ke kênaya aye Gulîstane bêra dîyîş û wina vat: “Qey nîna dîyîş ez nêzana. Vengê Wezîrîya Edaletî, Serekkomarî kena. Kênaya mi bivînê. 4 serrî yo cuye ma rê bîya jehr. Seba ma ne roje roje ya û ne zî şewe şewe ya.

XWEBÛN