Birayê Kemal Kurkutî: Wa na Newroze biba wesîleya edaletî

Kemal Kurkut Newroza 2017î de hetê polîsî ra ame qetilkerdiş. Birayê ey Ercan Kurkutî dîyar kerd ke, wa na Newroze biba wesîleya edaletî.

Kemal Kurkut wendekarê zaningehî bi û seba Newroze amebi Amed. Korkut, niqtaya kontrolê polîsan de hetê polîsan ra ame qetilkerdiş. Ser ra 7 serrî vîyartê. Fotografê cînayetî hetê rojnameger Abburrahman Gokî ra ameyê antiş û politikaya bêcezaverdişî hema zî yena ramitene. Birayê Kemal Korkutî Ercan Korkutî va, “Dewlete her Newroze Kemalî reyna kişena.”

“Aşma adare ma rê aşmêka xemgîn a”

Ercan Korkutî va, “Wexto ke ma kewenê aşma adare ma benê xemgîn. Kemal sembolanê Newroze ra yew o la xeylê embazê ma Newrozan de ameyê şehîdkerdiş. 2017î ra dima dejê ma hîna bi giran. No bar hetê dewlete ra yeno girankerdiş. Dewlete her verê Newroze Kemalî reyna kişena. Aşma adare xemgînî dana ma la reyna zî rastîya Newroze esta.”

‘Edaleto ke erey yeno edelet nîyo’

Kurkutî va, “2017î ra dima sûcdarêk ney şikdarêk vejîya mehkema û mehkemayêka formalîte ameye kerdene. Mehkema ra dima o zî ame veradayîş. Kemal do pêro Newrozan de ma reyde bo. Ma dewlete ra çîyêk nêpawenê. Kesêk nêgêrîya binê çimî û nêame tepiştene. Edealetî rê bawerîya ma nêmende. Tena kesêk ceza girewte, o zî Abdurrahman Gok o. Keso ke cinîyetî veto meydan. Wexto ke hal wina bo, bawerîya kesî edaletî rê nêmanena. Edaleto ke erey yeno edalet nîyo.”

‘Wa Newroze biba wesîleya azadîya Kurdistanî’

Ercan Kurkutî peynî de va, “Dewlete nêverdena birîna ma çikole bibesta. Her verê Newroze sole erzena birîna ma ser. Ez hêvî kena wa na Newroze biba wesîleya edaletî û heqanê merdiman û Kemalî reyna nêmirenê. Ez Newroza şarê Kurdî pîroz kena, wa na Newroze, 4 leteyê Kurdistanî de biba wesîleya azadî.”

MA / AMED