Cezaya hepsî dîyaye rojnameger Abdurrahman Gokî

• Newroza 2017î de Kemal Kurkût hetê polîsan ra amebi qetilkerdiş. Fotografê nê cînayetî hetê Abdurrahman Gokî ra ameybî antiş.

Newroza 2017î de Kemal Kurkût hetê polîsan ra amebi qetilkerdiş. Fotografê nê cînayetî hetê Abdurrahman Gokî ra ameybî antiş. 

Kemal Kurkût Newroza 2017î de hetê polîsan ra amebi qetilkerdiş. Fotografê cînayetî hetê Abdurrahman Gokî ra ameybî antiş. Derheqê ey de dewa ameybî akerkene û cezaya hepsî dîyaya ey. Dewaya ci Dîyarbekir de ameye dîyayene. Gok û awiqatî Resûl Temûr û Mehmet Emîn Aktarî mehkemaye de cayê xo girewt û hemkarê Gokî zî bîyê teqîbkar.

Gokî tek bi tek cewabî dayê îddîayan 

Addurrahman Gokî cewabî dayê îddîayan û va, “Şima fotografanê mi sey propagandayê rêxistinî vînenê la ez ney qebûl nêkena. Seke mi verî zî vatibi, sey muhabîrê şerî mi nê fotografî mîyanê şerî de antê. Xora nê fotografî ajans û televîzyonan de ameyê weşanayene. La meqamê îddîayan hema zî wazeno fotografan karê mi ra cîya bihesibno.”

‘Mi herinda Kobanî de Lazkîye binuştêne…’ 

Gokî derheqê karê xo de va, “Fotografanê mi de tena wextê antişî û cayê ci yenê nîşandayîş. Bê înan malûmatêk çin o. Coka ez meraq kena, binê fotografan de herinda Kobanî de, Lîbya, El-Bab, Îdlîb, Lazkîye, Azerbeycan biamêne nuştiş do reyna biamêne îddîakerdiş ke ez propaganda kena? Ez vana ney. Çimkî mi qet nêdîyo û nêeşnawito ke rojnamegerî şerî û muhabîrî karanê xo ver dewa bîyê.”

‘Rojnamegerî sûcan qeyd kenê’ 

Gokî va, “Rojnamegerî sûcan qeyd kenê û bi karê xo paştî danê heqîqetan. Bi kare rojnamegeran hesabî yenê perskerdiş û heqê merdiman yenê pawitiş. Şar bi sayeya înan xeberdar beno. La bedelê nê karî estê. Rojnamegerê ke şeran de xebitîyenê zaf zehmetîyan ancenê û rey-rey zî ganê xo danê. Mi zî nê pêroyî girewtê xo çim û ez mîyanê şerî de xebitîyaya. Mi xo pawit la 8 serran ra dima nika ez yena dewakerdiş. Eke hema zî meqamê îddîayan vano to propaganga kerdo, ganî îspat bikero ke kam propagandayê mi ver tesîrdar bîyo û sûcêk kerdo. Îddîanameyî de 3 fotografî estê. Kemal Korkût 21ê Adare 2017î de hetê polîsan ra ame kiştiş û mi fotografê ci antê û mi bi nuşteyêk parekerdê. Fotografo 2yin Kobanî ra ameyo girewtiş û mi xebera Osman Hemedî yê Kobanîyijî viraşta. Osman Hemed vato, ‘Tîya erdê ma yo û ma do erdê xo terk mekerê’.

‘Fotografanê Kurkûtî ver ez yena sûcdarkerdiş’ 

Rojnameger Gokî va, “Yeno famkerdene ke karanê xo ver ez yena sûcdarkerdiş. Înan ra tewr dîyarî zî fotografê cînayetê Kemal Kurkûtî yê. Kemal Kurkût hetê polîsan û meqamanê adlîyan ra sey bombayo gande ame nîşandayîş. Seba ke mi fotografê ey antê, fotografan ra aseno ke wina nîyo, şima wazenê ceza bidê mi. Bi fotografanê mi zaf zurî vejîyayê orte. Meqamê îddîayan seba ke wazeno seba karanê mi ceza bido mi, bitaybetî kamcîn fotografê ke çekî asenê weçînayê. Ez eqsê îddîayan beratê xo wazena.”

‘Seba ke cînayetî binimnê polîsan eşt keyeyê ey ser’

Abdurrahman Gokî ra dima awiqatê ci Resûl Temûrî qisey kerd û va, “Ma fikirîyêne ke dewa seba fotografanê cîneyetê Kurkûtî ameya akerdene. Cînayetî ra dima polîsan eşto keyeyê Abdurrahman Gokî ser. Ma vînenê ke no derheq de destûrêk çin o. Înan waşto delîlanê cînayetî vîndî bikerê. Ma verî ra nat vanê şima nêşkenê karanê rojnamegerîye ver ey sûcdar bikerê. Fotografî şeklê îfadekerdişî yê.”

Ceza zêdîyaye

Pawitişan ra dima mehkema sûcdarîya ‘Endamtîya Rêxistinî’ ra qerarê beraatî da. Mehkema bi sûcdarîya ‘Propagandayê Rêxistinî’ serrêk ceza da Abdurrahman Gokî. Mehkema cezaya ci zêdîna û serrêk 6 aşmî û 22 rojî ceza dîyaye ci. Mehkema cezaye ware nêarde û qerar da ke taloqkerdişî rê sebeb çin o.

MA/AMED