Dewaya JÎTEMî ya Kerboranî de qerarê beraatî

• Pîyê Davut Altinkaynakî Abdulazîz Altinkaynakî va, “Tirkîya de edalet çin o. Eke doman Tirk bibîyêne do cezaya îdamî biamêne dayene. Seba ke Davut domanêko Kurd o qerarê beraatî yeno dayene.

Derheqê 18 kesan de seba ke ‘delîlî nêameyê dîyayîş’ qerarê beraatî ame dayene.

Qezaya Mêrdînî ya Kerkoranî de mabênê 29ê Teşrîna Verêne 1995 û 8ê Adare 1996î de 3yê înan domanî 7 sîvîlî û çawişêko pispor vîndî bibî. Netîceya meseleye de Qûmandanê Tabûra Cendermeyî yê Mêrdînî Hurşît Îmren, Qûmandanê Cendermeyî yê Kerboranî Mehmet Tîre, Qûmandanê Cendermeyî yê Kerboranî yê Merkezî Mahmut Yilmaz, Hetkarê Qûmandanê Qereqolî Haydar Topçam, Çawişo pispor Kerîm Şahîn zî tede derheqê 18 kesan de dewaya ‘bi zanayene kiştiş’î abibî û mehkemaya 26ine Semsûrî de ameye viraştene.

Mutala ame tekrarkerdiş

Sawcîyê dosya bi îddîayê ‘Delîlî bes nîyê’yî mutalayê xo yê beraatî tekrar kerd. Dima birayê Seyhan Doganê 14 serrîyî Hîznî Doganî va, “Sawcî vano delil çin ê. Ma 1996î ra nat vanê, 7 cinazeyî estê û ameyê vêşnayene. Ewro na mehkema do qerarêk bida hela ma welatîyê têduştê yan ney. Mi cinazeya birayê xo mintiqaya ewlehîyî ya dewlete de dî.”

‘Maya ci asqîyê filistînî de dî’

Pîyê Davut Altinkaynakî yê 12 serreyî Abbulazîz Altinkaynakî va, “Ma mutalayê sawcîyî qebul nêkenê. 27 serrî verî cû domanê ma erzîyayê bîran. Arşîvan ra biewnê, înan lajê min o 12 serreyî ça ra berdo ça. Cayê oporasyonî û bîro ke ma lajê xo tede dî eynî ca yo. maya  ci Davutî qereqolî de asqîyê filistînî de dî. Qorîcîyan û eskeran lejê mi keye ra girewt. Çira nêard mehkema, berd eşt binê bîrî. Qatîlî beraat benê. Qerarêko wîjdanî bidê. Ma 7 serran ra nat yenê mehkemayan. Ma zulim vînenê. Ma yenê çira sûcdarî nînê. Ez heta peynîye dewakar a.”

‘Ma cinazayî bîran de dîyê’

Awiqatê keyeyan Erdal Kuzuyî va, “Memûrê Dewlete Adem Kûlî va gêrîyayê binê çimî. Cinazayê înan binê bîran de ameyê dîyayene. No delîl tena bes nîyo. Beyanatê memûranê dewşete esto û vanê nê kesî gêrîyayê binê çimî. Pêro cesedî mintiqaya ewlehîye de ameyê dîyayene. Seba Kurdan bîrî trajedîyê tarîxî yê. Dewî bîyê merkezê îşkenceyî. Qorîcîyî vanê ma keyeyî mojnayê înan. Kerîm Şahîn vano gêrîyayê binê çimî. Eke qerarê beraatî bidîyo hîkayeya 100 serrîye do dewam bikera. Ma wazenê nê 18 kesî bêrê cezakerdiş.”

Merdimanê JÎTEMî rê beraat

Mehkema derheqê sûcdaran de qerarê beraatî da. Mehkema va ‘delîlî bes nîyê’ û derheqê 18 merdimanê JÎTEMî de qerarê beraatî dîya. 

‘Seba ke lajê mi Kurd o..’

Keyeyanê domanan ra îtîrazî bîyê û pîyê Davut Altinkaynakî Abdulazîz Altinkaynakî va, “Tirkîya de edalet çin o. Eke doman Tirk bibîyêne do cezaya îdamî biamêne dayene. Seba ke Davut domanêko Kurd o qerarê beraatî yeno dayene. Tirkîya de edalet çin o, Tirkîya de sawcî çin o.” 

MA / SEMSÛR