Egîdê Kurdan Vedat Aydin

• Serekê HEPî yê Dîyarbekirî Vedat Aydin 31 serrî cû hetê JÎTEMî ra ame qetilkerdiş.

Serekê HEPî yê Dîyarbekirî Vedat Aydin 31 serrî cû hetê JÎTEMî ra ame qetilkerdiş.

Serekê HEPî yê Dîyarbekirî Vedat Aydin 5ê Temûze 1991î de hetê JÎTEMî ra ame girewtiş û bi destê înan ame qetilkerdiş. Vedat Aydin derbeya 12ê Êlule de gêrîyabi û 4 serrî hepis de mendibi. Badê vejîyayîşê xo ey waşt bi embazanê xo Komeleya Heqanê Merdiman awan bikero. 1990î de bi îdarekarê Komeleya Heqanê Merdiman a Dîyarbekirî. 28ê Teşrîna Verêne ya 1990î de Enqera de Komeleya Heqane Merdiman de qiseykerdişêko Kurdkî kerd û nê qiseykerdişî ver ame girewtene. Aydin mehkema de zî Kurdkî qisey kerd. 4 aşman ra dima hepis ra vejîya. 1990î de bi serekê Komeleya Heqanê Merdiman a Dîyarbekirî. Hezîrana 1991î de kongreya HEPî ya Dîyarbekirî virazîya û Vedat Aydin bi serekê HEPî yê Dîyarbekirî. 5 elemananê JÎTEMî 5ê Temûze de şîyê keyeyê ey, înan xo sey polîsan da şinasnayîş. Vedat Aydin hetê înan ra keyeyê xo ra ame girewtiş. Cinazaya ey 7ê Temûze de qezaya Madenî de, binê pirdeki de ameye dîyayene. Vedat Aydin bi îşkenceyan amebi qetilkerdiş. Merasîmê cinazaya ey de bi hezaran kesî ameyê pêser. Polîsan guleyî varnayê şarî ser, 8 kesî merdê û xeylê kesî zî bîyê birîndar.

Dewaya ci bi vîyartişê wextî ameye padayene

Dosyaya dewaya ci 1996î de ameye hedrekerdiş. Wextêko kilm mendibi ke dewa bi vîyartişê wextî bêra padayene, îfadeyê îtîrafkarê JÎTEMî yê Abdulkadir Ayganî 2011î de kewtê dosya. Ayganî îfadeyî xo de va Vedat Aydin hetê ekîba Cem Erseverî ra ame kiştiş. Sawcî derheqê Yeşîl(Mahmut Yildirim’î de qerarê tepiştişî da. La mîyanê serran de dewa de averşîyayîş nêbi û Yeşîl nêame tepiştiş. Dewa 30 serrê xo qedînayê û 5ê Temûze 2021î de vîyartişê wextî ver ameye padayene.

MERKEZÊ XEBERAN