- Hemverfeka HDKyî Esengul Demîre dîyar kerd ke azadîya fizîkî ya Abdullah Ocalanî do çareserîya meseleya Kurdan rê havile bikera.
ÎBRAHÎM IRMAK / ÎSTANBÛL
Hemverfeka HDKyî Esengul Demîre, serrgêra 25ine ya komploya mîyanneteweyî de tecrîdê serê Serekê PKKyî Abdullah Ocalanî û çalakîyê ke yenê kerdene erjnayê.
‘Ameyoxê şaran binê talukeyî de yo’
Demîre dîyar kerd ke tecrîd ameyoxê şaran ser de zî tesîr keno û va, “Ma vînenê ke nîjadperestîye berz bena, butçe herinda ke perwerde û sihetî rê xerc biba şerî rê xerc bena, akademîyî bêîtîbar benê û heqê demokratîkî yenê binpaykerdene. Nê zî ramojnenê ke wazenê faşîzm awan bikerê. Ma nêşkenê na rewşe polîtîkaya tecrîdî ra cîya bigerê. Naye ra zî ganî raya pêroyîye û pêro şarî vera tecrîdo ke Birêz Ocalanî ser de yeno ramitene bivejîyê. Çunke ameyoxê înan û cuya înan a demokratîke binê talukeyî de yê.”
‘Tecrîd û meseleya Kurdan girêdayê yewbînî yê’
Demîre dîyar kerd ke seba çareserîye ganî Abdullah Ocalan bi fizîkî azad bibo û ey reyde muzakereyî bêrê kerdene. Aye va, “Muzakereyanê 2013-1015î ramojna ke bê şer şarî eşkenê haştîyêka komelkî awan bikerê. Muxataban ra yew zî Birêz Ocalan bi. Ey dîyar kerdibi ke bi çareserîya meseleya Kurdan do demokrasî bêro awankerdene. La çi heyf ke Mutabaqatê Dolmabahçeyî ra dima dewlete masa dêm daye û no proses qedîya. A roje ra heta nika zî gamêke nêameya eştena. Fikrê Birêz Ocalanî heta Tirkîya ney Rojhelatê Mîyanênî û hêzanê mîyannetewîyan ser o zî tesîr kenê. Komploya mîyanneteweyî na raştîye mojnena ma. Coka, azadîya Birêz Ocalanî yena vateyê azadîya fikran zî. Seba ke çareserîya meseleya Kurdan de aktoro tewr muhîm Abdullah Ocalan û fikrê ey ê, ganî bi fizîkî zî azad bibo.” MA
