Golik bi qepaxê ‘Jin, Jiyan, Azadî’ vejîya

• Kovara mîzehî ya Kurdkî Golik, bi qepaxê ‘Jin, Jiyan, Azadî’ vejîya.

STÊRK SUTCU / MA / ENQERA

Kovara mîzeh û karîkaturî ya Kurdkî Golik, 5 seran ra dima aşma Tebaxe de newe ra vejîyaybi û weşana xo ramneno. Nuştox û xêzkarê kovare girewte yê. Seba ke girewteyî sewqê hepsanê cîyayan bîyê û meseleyanê ekonomîkî ver, kovare 2017î de weşana xo daybî adilnayene. Kovare 5 serran ra dima reyna qerarê weşanayîşî da. Kovare hûmara xo ya 20ine de, bi qepaxê ‘Jin, Jiyan, Azadî’ vejîya.

Derhênerê Weşane yê Kovare Îsmaîl Aktaşî, derheqê 15ê Teşrîna Peyêne Roja Nuştoxanê Hepsîyan de erjnayîşî kerdê.

‘Golik îteatî qebul nêkono’

Îsmaîl Aktaşî va, “Golik hetê girewteyanê sîyasîyan ra ame hedrekerdiş û weşanayîş. Kovare meseleyanê ekonomîkî ver mecbûr mend ke 5 serrî mabên bido. Golik tek kovara mîzehî ya Kurdkî yo. Golik, îteatî û milçewtkerdişî qebul nêkeno. Şima nêşkenê golikî bi bendî girê bidê. Coka girewteyanê sîyasîyan ê Kurdan no name de qerar da. Golik 3 aşman de reyêk bo zî weşana xo ramneno. Tek kovara karîkaturî ya Kurdan o. No seba ma keyfweşî yo û serkewtişêko pîl o.”

Xoverdayîşê cinîyan ê Rojhelatî ame selamkerdiş

Aktaşî va, “Hûmara peyêne bi qepaxê ‘Jin, Jiyan, Azadî’ vejîya. Ma waşt selam bidê xoverdayîşê cinîyan ê Rojhelatî. Ma vanê, ma çar lete nîyê ma leteyêk ê. Golik hîna zêde Kurdistanê Bakûrî ra binge geno la wazeno vengê Rojava, Rojhelat û Başûrî zî bikirişno. Golik Rohlelat de zî xeylê eleqa dî. Çi heyf ke ambargoyî ver ma nêeşkayê bişawê Rojava. Seba ke çapemenîya azade wextanê peyênan de raştê hêrîşan yena, ma nêşkenê bi temamî xo birasnê wendoxan.”

Yeno astengkerdiş ke kovare bêra hepisxaneyan

Dewamê qiseykerdişê xo de Aktaşî va, “Ekserîyê nuştoxanê Golikî hepisxaneyan de yê la nêverdenê kovare bêra hepisxaneyan. Na zî rewşêka ecêb a. Nuştoxî, roşnvîrî û rayberî erzîyayê hepis. Çi beno wa bibo, ma nusenê, xêz kenê û kovara xo vejenê.”

Kurdan de mîzeh polîtîk o

Aktaşî va, “Kurdan de mîzeh polîtîk o. Domanî zî, kokimî zî prosese polîtîkî zanê. Kurdî erzîyenê hepsan, raştê asîmîlasyonî yenê, her roje çîyê xirabî qewimîyenê la ma mîyanê na rewşa xirabe de eşkenê xebatêka mîzehî bikerê. Şarê ma pay ra maneno û bi hêv3iye ewnîyeno ameyoxê xo ra. No şar xo ver dano û mîsyonê xo ca ano. Doman û kedkarê nê şarî zî xebatanê winasîyan kenê.”

‘Tirkîya bîya hepisxaneyêk’

Îsmaîl Aktaşî peynî de va, “Tirkîya seba rojnamegeran bîya hepisxaneyêk. Xeberanê kîmyewîyan ver rojnamegerî ameyê girewtene. Heyetê xoserî eşkenê cigêrayîşan bikerê. Yan zî ê eşkenê heyetêk bierşawê. La îqtîdar nêwazeno. Rojnamegerî û Şebnem Korur Fîncanci ameyê girewtene. Sey Golikî awirê ma û fikrê ma dîyar o. Ma hêvî kenê ke, hetê heyetanê mîyannetewîyan ra heqîqetî bivejîyê meydan.”