Rêxistinê HDPyî yê Avcilarî, bi paştîdayîşê Enstîtuya Kurdî kursê Kurdkî akerd.
UNESCOyî 21ê Sibate yê 2022yî Roja Ziwanê Dayîke de tayê malûmatî pare kerdê. Goreyê nê malûmatan dinya ser de nêzdîyê 6 hezar ziwanî yenê qiseykerdiş. Reyna goreyê nê malûmatan se ra 43yî yê nê ziwanan binê talukeyê çinbiyayîşî de yê. Atlasê nê ziwanan ame hedrekerdiş. Goreyê malûmatanê atlasî her 15 deqîqeyan de ziwanêk çin beno.
Do 9 aşmî dewam bikerê
Seba ke Kurdkî vila biba, hetê Rêxistinê HDPyî yê Avcilarî ra bi paştîdayîşê Enstîtuya Kurdî 18ê Teşrîna Peyêne de kursê Kurdkî dîyayê dest pêkerdene. Kursî do 3 astan de bêrê dayene û 9 aşmî dewam bikerê. Qeydê kursan do heta peynîya Kanûne biramê. Kursî do her roja êneyî awanîya HDPyî ya Avcilarî de mabênê 18.00 û 20.00î de bêrê dayene.
Komîsyonê Perwerdeyî yê HDP Avcilarî ra Semîh Sungulî dîyar kerd ke, vera polîtîkayanê asîmîlasyonî do tena kursî ney, semîner û konferansî zî bêrê viraştene.
Semîh Sungulî va, “Kurdkî ziwanêko Hînd Ewrûpî yo û ziwanêko gerdûnî û dewlemend o. Hetê sîstemî ra pozîsyonêko sîyasî dîyayo Kurdkî la no raşt nîyo. Hewce nêkeno merdim vateyanê cîyayan û mîsyonêk bibo ziwanî. Kurdkî ziwanê şarê Kurdî yo û bi lehçeyanê cîyayan yeno qiseykerdiş. Wexto ke no ziwan çin bibo, do kultur zî bimiro. Tîya de berpirsîyarîya tewr pîle kewena Kurdan ser.”
Kursan rê silayîye
Sungulî, seba ke verê asîmîlasyonî bêro girewtiş, Kurdkî aver şêro û vila bibo her kesî silayna kursanê Kurdkî.
MA / ÎSTANBÛL
