Hemserekê Pêroyî yê HEDEPî: Ma do vera dewayanê kumpasan xoverdayîşê xo bidomnê

Hemserekanê Pêroyî yê HEDEPî derheqê girewtişê Huda Kaya de va, “No girewtiş teberê hiqûqî de yo. Ma do vera dewayanê şima yê kumpasan gamêke têpîya meerzê.”

Parlamentera verêne ya HDPyî Huda Kaya, dewaya Kobanî ra ameye girewtene. Derheqê girewtişê aye de Hemserekanê Pêroyî yê HEDEPî Tulay Hatîmogullari û Tuncer Bakirhanî nêrazîbîyayîşê xo pare kerdê.

Hatîmogullari hesabê xo ser ra nê çîyî nuştê: “Wekîla ma Huda kaya, 1ê Teşrîna Pêyêne Roja Kobanî ya Dinya de ameye girewtene û bin o qeyde îqtîdaro sîyasî mesajêk dîyeno ma. No qerar teberê hiqûqî de yo û qerarêko sîyasî yo. Îqtîdar hêvî keno ke operasyonanê qirkerdişî ra havile bigero la nêşkeno serbikewo. Ma verê hevala xo Huda de yê. Ma do pîya xo ver bidê û pîya azad bibê.”

Bakirhanî hesabê xo ser ra nê çîyî nuştê: “Îqtîdar, Roja Kobanî ya Dinya de bi girewtişê wekîla ma Huda Kaya mesajêko sîyasî dano ma. Ma veng a îqtîdarî danê. Ma do vera dewayanê şima yê kumpasan gamêke têpîya meerzê. Huda Kaya senî ke vera darbekaranê 28ê Sibate sere nêna ro, vera darbeyanê şima yê sîyasîyan zî do sere mena ro.”

MERKEZÊ XEBERAN