Turk: Kurdî pay ra yê û seba azadîye xover danê

Ahmet Turk, kongreya HEDEPî ya Mêrdînî de qisey kerd û dîyar kerd ke Kurdî pay ra yê û seba azadîye xover danê.

Partîya Têduştî û Demokrasî ya Şaran (HEDEP), Mêrdîn de kongreya xo viraşte. Weçînayîşê endamanê dîwanî ra dima, kongre bi payravindertişê hurmetî dest pêkerde.

Seba azadîye û têduştîye bedelê pîlî ameyê dayene

Sîyasetmedar Ahmet Turkî qisey kerd kerd û va, “Dek û dolabî yenê kerdene la Kurdî pay ra yê û xover danê. Ewro bi hezaran Kurdê ke ameyê weçînayene hepis de yê. Kurdan bedelê pîlî dayê. Abdullah Ocalan o ke seba Kurdan berêkî cuye akerdo binê tecrîdî de yo. Xoverdayîşê ma xoverdayîşê têduştî, azadî, demokrasî û edaletî yo. 40 serran de xeylê partîyê ma ameyê padayene. La Kurdî ewro pay ra yê û seba azadîye xover danê. Derdê ma tena weçînayîşê ma nîyo, ma ganî şarê xo sîyaseto demokratîk de temsîl bikerê. Ma weçînayîşê zaf muhîmî vîyarnayê. Zaf cayan de rayê ma kewtê. Na kêmanîya şarî ney kêmanîya ma ya. Ma ganî rexneyanê xo bidê. Ez embazan rê serkewtiş wazena.”

Heta tecrîd meşikîyo azadî nîna

Parlamentera HEDEPî ya Mêrdînî Salîha Aydenîze dima qisey kerd û bale ante grevê vêşanîye ser o û va, “Tecrîd, şexsê Abdullah Ocalanî de pêro komelî ser de yeno ramitene. Heta tecrîd meşikîyo azadî nîna û polîtîkayê gemarin ê ke komelî ser de yenê ramitene neqedîyenê.”

Qiseykerdişan ra dima weçînayîş ame kerdene û hemserekîya HEDEPî ya Mêrdînî rê Mehmet Mihdî Tunç û Necla Acibuca ameyê weçînayene.

MA / MÊRDÎN