Misir de mûmyayê ‘ziwan zernênî’ ameyê keşfkerdene

Goreyê malûmatan ziwanê nê mûmyayan ameyê vetiş û herinda înan de pelê zernênî ameyê cakerdiş.

2021î de Misir de mintiqaya Qewaîsna de hetê cigêrayoxan ra kekatêko ziwan zernên amebi dîyayene. No keşif hetê demî ra mabênê verê mîladî 300 û badê mîladî 640î de amebi tarîxkerdiş. Eynî mintiqa de mûmyayê cinîyêk, camêrdêk û domanêk ameyê dîyayene û ê zî ziwan zernên ê.

Goreyê pisporan, ziwanê mûmyayan wextê mûmyakerdişî de ameyê vetiş û seba ke ê bieşkê ‘Efendîyê Binê Erdî’ homa Osîrîsî de qisey bikerê, herinda ziwanê înan de pelê zernênî ameyê cakerdiş.

Goreyê Serekê Konseyê Arkeolojî yê Misirî Dr. Ayman Ashmawîyî dîyar kerd ke, kinitişê ke tîya de bîyê mojnenê ke, no mezelca 3 wextanê cîyayan de ameyo gurînayene. 

Hetê arkeologan ra ameyo tespîtkerdiş ke, mûmyayî cîya-cîya ameyê definkerdene û cîhetê înan zî yewbînî ra cîya yê.

Mintiqa 1989î de ameye keşfkerdene. Tîya de wextanê Ptolemaîk û Romayijan ra berhemî ameybî dîyayene.

MERKEZÊ XEBERAN