‘Pereyî şerî rê yenê xerckerdiş’

Krîzê ekonomîyî roje bi roje giran beno. Dîyarbekirijî vanê ganî dewlete polîkayanê şerî ra fek raverda.

Krîzê ekonomîyî çend şino giran beno. Sînorê vêşanbîyayîşî yê keyeyê qijkekî bîyo 6 hezar 391 TL. Her çî bîyo dila û rewşêka kaotîke esta. Dîyarbekirijî vanê ‘Ganî pereyi polîtîkayanê şerî rê meyerê xerckerdiş’.

Welatîyan ra Bayram Zamanî va, “Teyareyêka şerî bi mîlyonan wurzena la şar perişan o. Şarî nêfikirîyenê. Wazenê şar tim muhtacê înan bo. Heta ke no şer dewam bikero, Kurdan ser o tehdayî bibê û na dîktatorî dewam bikera, krîz nêwedarîyeno.”

‘Do xela biba’ 

Mehmet Gunyaktiyî va, “Çewala ardan bîya 500 lîra, çutê solan bîya hezar lîra. Ma nêşkenê domananê xo rê çîyêk biherînê. Nê xo sey homayan vînenê. Eke nîya şoro do xela biba.”

Welatî Haşim Bûlûtî va, “Nika seba şerî butçeya îlawe ameya vetiş. Ne Kurdî ne Tirkî înan ra razî nîyê. Însanî întîxar kenê. Sebebê înan polîtîkayê îqtîdarî yê. Wazeno bi polîtîkayanê şerî xo birasno weçînitiş.”

MA/AMED