Vartînîs de yadkerdene: 30 ney 300 serrî zî bivîyarê, ma do xo vîrî ra mekerê

Yadkerdişê Qetlîamê Vartînîsî de Hemsereka Pêroyî ya DBPyî Salîha Aydenîze qisey kerd û va, “30 ney 300 serrî zî bivîyerê, no şar do xo vîrî ra mekero.”

3yê Teşrîna Verêne yê 1993î de nahîeya Vartînîsî ya qezaya Têlî ya Mûşî de keyeyê Ogutan ame veşnayene û 10 kesî ameyê qetilkerdene. Serrgêra qetlîamî de bernameyê yadkerdişî ame kerdene. Hemsereka Pêroyî ya DBPyî Salîha Akdenîze û xeylê kesî şîyê Vartînîs. Eskeran nêverda ê şorê nahiye û naye ser o zî Aydenîze herinda xo de eşkerayîya çapemenî kerde.

Aydenîze va, “1993yî de qetlîamêk ame kerdene û merdimi ameyê veşnayene. Na dewlete Kurdan rê nê kerdenan heq vînena. Na dewlete pitika pîzeyê dadîye rê cuye heq nêvînena û ewro zî nêverdena ma şîme û yadkerdişêk bikerîme. Nê kerdenî 100 serrî ra nat yenê ma ser de. Eke Aysel Ogut a ke qetlîamî ra xelisîyaye qisey mekerdêne, dewlete do sey xeylê hedîyeyan serê nê qetlîamî zî bigirewtêne.”

Vera Kurdan dişmenîya 100 serran

Aydenîze dîyar kerd ke wazenê dewaya Vartînîsî vîyertişê demî ver bifînê û va, “2 serrî yo eskero ke qetlîam de cagirewte nîno tepiştene. Nê netîceyê polîtîkaya bêcezaverdişî yê. 30 ney 300 serrî zî bivîyerê, no şar do qetlîamî û pitika pîzeyê dayîke xo vîrî ra mekero. Ewro Serekkomar vejîyeno behsê qanûnê bingeyî keno. No qanûno bingeyî yê kamî yo? Eke ma ewro nêşkenê bikewê Vartînîs şima kamcîn qanûnê bingeyî ra behs kenê. Ma do çirey nê qetlîamî xo vîrî ra mekerê. 100 serrî yo vera Kurdan dişmenîye yena kerdene û sebebê nê qetlîamî zî no yo. Na dişmenitî ra çîyêko baş nêvejîyayo. Na dişmenitî ver do krîzî hîna bibê giran û dîktatorîye qeyîm biba.”

Mûze ameye zîyaretkerdene

Yadkerdişî ra dima, Aydenîze şîye dewa Vartînîs û keyeyo ke qetlîamî ra dima bibi mûze hetê aye ra ame zîyaretkerdene.

MA / MÛŞ