Wendegehê Muzîkî yê Egîdê Cimoyî bi coşîya pîle ame akerdene

Wendegehê Muzîkî yê Egîdê Cimoyî, Îstanbûl Kadikoy de bi şayîyêke ame akerdene.

Çalakîya akerdişî ya Wendegehê Muzîkî yê Egîdê Cimoyî, Kadikoy de Merkezê Kulturî yê Kozyatagi de ameye viraştene. Hemserekê HDKyî Esengul Demîr û Cengîz Çîçek, Verfeka HEDEPî Ayşegul Dogan, Hemserekê Pêroyî yê DBPyî Çîgdem Kiliçgun Uçar û Keskîn Bayindir, hunermendî û xeylê welatîyî bîyê beşdarê çalakîye. 

Qiseykerdişê akerdişî hetê hunermend Kemal Yildirimî ra ame kerdene. Yildirimî dîyar kerd ke Kurdî bi se serran ra nata xo ver danê û va, “No xoverdayîş seba ma zaf muhîm o. Çunke no xoverdayîş qey azadî û estbîyayîşê ma ameyo dayene. Kurdî ganî bi ziwan, kultur û nasnameyê xo pay ra bimanê û xoverdayîşê xo hîna xurt bikerê. No wendegeh zî coka seba ma zaf muhîm o. Vera kulturê Kurdan tedayî dewam kenê û vera înan zî xoverdayîşê ma dewam keno. Ma ewro Wendegehê Muzîkî yê Egîdê Cimoyî akerd. Ma zaf keyfweş ê û seba ke şima ma het de yê keyfweşîya ma hîna zêdîyaya.”

Ey ra dima hîkayevatox Ayhan Erkmenî cuya Egîdê Cimoyî ser o qisey kerd û wendekarê Egîdê Cimoyî Mîroyê Qanat zî zele cinite. Ranojnayîşê sînevîzyonî ra dima çalakîye bi konserê JinMayî qedîyaye.

MA / ÎSTANBÛL