Rojê Ma Musicî yê 5inî dest pêkenê

Rojê Ma Musicî yê 5inî 7ê Hezîrane de do dest pêbikerê. Hetê Akademîya Ma Musicî ra gazîya beşdarbîyayîşî ameye kerdene.

Akademîya Ma Musicî, emser do reya 5ine Rojanê Ma Musicî biviraza. Rojê Ma Musicî do 7ê Hezîrane de dest pêbikerê û heta 11ê Hezîrane dewam bikerê. Çalakîyî do Ma Music Center û Zarok MA de bêrê viraştene.

Kurdkî zîl dana

Mamosteyanê Ma Musicî ra Ferhat Ertaşî va, “Vera qirkerdişê kulturî ma wazenê bi xebatanê xo ramojnê ke Kurdkî her ca ra zîl dana. Wexto ke domanî xebitîyenê, ma kelecanê înan vînenê û motive benê. Wa keyeyî zî bêrê û bibê şerîkê kelecanîya domananê xo. Domanê ma Kurdkî fikirîyenê, Kurdkî qisey kenê û Kurdkî cuwîyenê.”

Projeya Dewa Muzîkî

Ertaşî va, “Domanê ma seba ma zaf muhîm ê. Mîyanê hende asîmîlasyonî de na xebate zaf muhîm a. Ma wazenê xo birasnê pêro domanan û înan bê muzîk meverdê. Seba ke ma xo birasnê înan ameyox de projeye ma yê cîyayî estê. Seba domananê teberê welatî projeye ma estê. Reyna seba domananê ma yê Japonyayî projeyê ma estê. Reyna projeya ma ya Dewa Muzîkî esta. Domanî do bieşkê na dewe de keyeyanê xo reyde bicuwîyê.”

Rojanê Ma Musicî rê silayîye

Ertaşî şar silayna rojanê muzîkî û va, “Înan ke heta ewro perwerdeyê enstruman û vengî girewto do konser bidê. Domanî zî do hunerê xo pêşkêşê şarî û keyeyanê xo bikerê.”

MA / AMED