1ê Sibate de ‘Rayraşîyayîşê Azadîye yo Pîl’ dest pêkeno

Sazîyanê komelê sivîlî û partîyanê sîyasîyan Amed de bi kombîyayîşêk eşkera kerde ke do 1ê Sibate de ‘Rayraşîyayîşê Azadîye yo Pîl’ bidîyo dest pêkerdene.

Sazîyanê komelê sivîlî û partîyanê sîyasîyan seba ke tecrîd bêro wedartene û meseleya Kurdan bêra çareserkerdene 1êSibate de ‘Rayraşîyê Azadîye yo Pîl’ danê dest pêkerdene. Rayraşîyayîş do 1ê Şibate ra heta 15ê Sibate dewam bikero. Derheqê rayraşîyayîşî de Amed de kombîyayîşêk ame kerdene. Parlamenterî û temsîlkarê sazîyan bîyê beşdarê kombîyayîşî.

Hêverî Parlamentera DEM Partî Berîtan Guneşe qisey kerd û va, “Ma hêvî kenê ke wa no rayîrşîyayîş şaranê Kurdistan û Tirkîya rê rayîrê çareserîye akero. Seba ke meseleya Kurdan bêra çareserkerdiş ganî Birêz Ocalan rolê xo biyaro ca û seba ney zî ganî bi fizîkî azad bibo.”

Aye ra dima Hemserekê Pêroyî yê DBPyî Keskîn Bayindirî metne çapemenîye wend û va, “Birêz Ocalan binê tecrîdê mutlaqî de yo û ci ra 2 serrî û 10 aşmî yo yanî 1037rojî yo xeberêke nîna girewtene. Tecrîdo mutlaq yeno vateyê îşxalkerdişê cografyaya Kurdistanî û polîtîkayanê şerî. Seba ke krîzî bêrê çareserkerdene ganî sîstemê tecrîdî yê Îmraliyî bêro wedartene û Birêz Ocalan biraso azadîya xo.”

‘Ocalan yeno vateyê çareserîya demokratîke’

Bayindirî dewamê ci de va, “Azadîya fizîkî ya Birêz Ocalanî yena vateyê çareserîya demokratîke ya meseleya Kurdan. Ma do mabênê 1ê Sibate û serrgêra komploya mîyanneteweyê 15 Sibate de bajar û qezayanê Kurdistanî de ‘Rayraşîyayîşê Aazadîye yo Pîl’ bikerê.

Ganî Birêz Ocalan bieşko awiqat û keyeyê xo reyde pêvînayîşan bikero û seba ke meseleya Kurdan bêra çareserkerdene ganî bi fizîkî azad bibo. Heta ke sîstemê tecrîdî meyero wedartene û dek û dolabî bêrê pûçkerdene ma do mevindê. Ma do vera nê bêhiqûqîyan çirey bêveng memanê. Ma sere de şarê xo û dostanê xo û raya pêrorîya demokratîke rê gazîye kenê ke wa wayîrê na çalakîya ma bivejîyê.”

MA / AMED