AÎHMî ra qerarê ‘Kurdistan’î

Osman Baydemîrî seba ke meclîs de vatibi ‘Kurdistan’ ci rê ceza amebî dayene. AÎHMî na ceza neheq dî û do tazmînat bidîyo Baydemirî.

Hemserekê Verênî yê Beledîyeya Amedî û Parlamenterê HDPyî yê Verênî yê Rihayî Osman Baydemîrî rê seba ke meclîs de vatibi ‘Kurdistan’ 2017î de ceza amebî dayene. AÎHMî na ceza sey binpaykerdişê azadîya îfadekerdişî hesibna.

Mehkema muracatê Baydemîrî ser o ame pêser û qerar da ke ganî Tirkîya 16 hezar 957 euro tazmînat bida.

Se bibi?

2017î de roniştişêkî meclîsî de Osman Baydemîrî vatibi, “Ez sey ewladêkî şarê Kurdî, sey temsîlkarêkî Kurdistanî rolêko winasî dana xo: Wa no ban bibo banê şerîkî yê Kurdan û Tirkan.” Seba nê vateyan cezaya dîsîplînî dîyaybî Baydemirî û hîrê ra yew ê meaşa ci amebî birnayene. 

Baydemirî seba na ceza Mehkemaya Qanûnê Bingeyî rê muracat kerdibî. Mehkema vatibî ma nêewnîyenê cezayanê dîsîplînî ra û Baydemirî zî AÎHMî rê muracat kerdibi.

YENÎ YAŞAM