‘Cayo ke gonîya domananê ma rişîyaya cayê festîval û şayîye nîyo’

• Keyeyan va ma Sûr de mîyanê molozan de gêreyê cinazayanê xo û înan gazîya şarî kerd ke wa kes beşdarê festîvalî mebo.

MEHMET GULEŞ / MA / AMED

Wezaretîya Kultur û Turîzmî do qeyyûmê Dîyarbekirî reyde mabênê 8-16ê Teşrîna Verêne de Sûr de festîvalêk bivirazo. Qerarê festîvalî hetê şarî ra yeno rexnekerdiş. Keyeyanê ke şerê Sûrî de domanê xo merdibî vera festîvalî nêrazîbîyayîşanê xo nîşan danê. 

Dadîya Rozerîn Çukura ke 2016î de Sûr de ameybî qetilkerdiş Fahrîye Çukure va, “Sûr de dejêko zaf pîl qewimîya. Nika seba keyfî senî dofestîval bêro viraştene. Domanê ma ameyê qetilkerdiş û înan çîyêk nêverda. Sûr de gonî rişaye. Nika vanê ma festîval virazenê. Ma hêverî meseleyan zelal bikerê.”

‘Wa kes beşdarê festîvalî mebo’

Fahrîye Çukure va, “Kenaya min a 17 serrî û xeylê ciwanî uca de ameyê qetitkerdiş. Ganî kes beşdarê ê festîvalî mebo. Sûr de hema zî cinazayî estê. Hema dadîyan cinazayê xo nêgirewtê. Hema hêsîrê çimanê ma ziwa nêbîyê. Ma dayîkî nêwazenê hêsranê çimanê ma ser de festîval û şayîye bibê.”

‘Sûr ame çinkerdiş’

Dayîke Fahrîye Çukure veng a Dîrabekirijan da û va, “Wa meşorê ê festîvalî. Çunke uca cayê keyf û şayîye nîyo. Kesê ke fikirîyeyê ganî meşorê. Kesê ke zanê dejê domanan senîn o wa meşorê. Ganî hunermendî zî meşorê ê festîvalî. Eke hunermend ê wa heqîqetan bizanê hema bivejîye sehne. Binê ê bazaltan de gonî û cendekê ciwanan estê. Ez tîya de bermena la tayî do şorê uca de keyf bikerê. No exlaqî nîyo. Ma mîyanê çopî de cinazayê xo gêrayê. Wa Şarê Amedî xo vîrî ra mekero. Cinazayî mîyanê molozan de mendê. Nika wazenê festîval bivirazê. Wa şar vera vindero. Sûr bi şerî ame çinkerdiş. Tede domanî, gerguşî merdê. Wa Şarê Amedî nînan bifikiro û meşêro ê festîvalî.”

‘Wa cinazayan bidê keyeyan’

Pîyê Firat Çelîk Vezîr Çelîkî va, “Lajê mi 100 rojî Sûr de mend. Mi cinazaya lajê xo 3 aşmî cuwapêy girewte. Tayê cinazayî hema zî nêdîyayê keyeyan. Heya ke ez weş bî, ez do dejanê Sûrî xo vîrî ra mekerê. Înan kemere ser de kemere nêverda. Cinazayî binê kemeran de mendê. Çira cayêko winasî de festîval virazenê? Seke Sûr de çîyêk nêqewimîyayo û nika zî festîval virazenê. Wa cinazayan bidê keyeyan. Nê pêroyî verê çimanê dinya de qeqimîyayê. Ganî no festîval mevirazîyo. Rîyê înan senî geno ke wazenê festîval bivirazê. Ganî Kurdî û Amedijî beşdarê ê festîvalî mebê.”