Awiqatê keyeyê Arslanî: Cinaza sey ‘emaneta edlî’ ameye dayene

• Cinazaya Hakan Arslanî mîyanê tewreyêk de dîyaybî pîyê ci. Awiqatê keyeye Arslanî Ferhat Kilinçî va, “Ganî cinaza mîyanê tawitêk de biameyêne dayene. La sey emanetêka edlî tewreyêk de ameye dayene.

EYLEM AKDAG / MA / AMED

Hakan Arslan 2015î de Dîyarbekir Sûr de şerê bajarî de merdibi. Esteyê Arslanî 7 serrî cûwa pey mîyanê tewreyêk de teslîmê keyeyê ci bîyê. Esteyê Arslanî Kûrûma Tib a Edlîye ya Îstanbûlî ra tespîtê nasnameyî ra 10 aşmî ra pey erşawîyayê Dîyarbekir û tîya de mîyanê tewreyî de dîyayê pîyê ci. Awiqatê keyeyê Arslanî Ferhat Kilinçî derheqê prosesî de qisey kerd.

Seba cinaza 2 keşîfî ameyê kerdene

Ferhat Kilinçî va, “Hakan Arslan 2015î de şerê Sûrî de birîndar bi û hefteyêk ra dima zî merd. Cayo ke cinaza tede ameybî definkerdişî de 2 rey keşif ame kerdene la cinaza nêameye dîyayene. Dima 7ê Sibate 2021î de Sûr de cinazeyêk ameye dîyayene û ma seba na cinaza muraceat kerd. Têvernayîşê DNAyî ra eşkera bi ke cinazaya Arslanî ya. La sawcitî qerar da ke esteyan bierşawo Îstanbûl. Ma qasê 10 aşman paweyê otopsîyî vindertê. Vîzêr zî cinaza ameye teslîmkerdiş.”

Cinaza sey emaneta edlî ameye dayene

Kilinçî va, “Eke cinaza temam bo morg de yena tepiştene. DNA û teşhîsî ra dima yena temsîmkerdiş. La eke cinaza temam nêba, badê otopsi ra ganî mîyanê tawitî de bêra teslîmkerdiş. La çi heyf ke esteyê ke cinaza ra manenê, sey emanetanê edlîyan erzîyenê qutî û tewreyan û yenê teslîmkerdiş. Mevzûatî de derheqê na mesele de qanûnêk çin o. Ma sawcitîye rê îtîrazê xo kerdê. Ma va beno ke goreyê şima mevzûat wina yo la no goreyê wîjdanî raşt nîyo. Ganî teslîmkerdişê cinazayan de hîna xesas bêro têgêrayîş. Verî cû zî çîyêko winasî qewimîya. Cinazayêk mîyanê qutîyêk de ameybî erşawitiş. No xatirayê merdiman rê heqeret o û bêhurmetî ya.”
Awiqat Ferhat Kilinçî peynî de va, “Eke keye biwazo ma do dewa akerê. Nika birîna keyeyî newî ya. Ez nêşkaya înan de derheqê meseleye de qisey bikerî. Ma do dima muraceatanê xo bikerê. Ma do raporê otopsîyî ser o cigêrayîşan bikerê, keyeyî de qisey bikerê û dima zî ma do hem derheqê tewreyî de dayîşê cinaza de hem zî prosesanê bînan de goreyê waştişê keyeyî muraceatanê xo bikerê.”