Dayîkê Haştîye: Ganî vera şerî tora xoverdayîşî bêra awankerdene

FETHÎ BALABAN / MA / ÊLIH

Meclîsê Dayîkanê Haştîye yê Êlihî dîyar kerd ke ganî vera şerî tora xoverdayîşî bêra awankerdene.

Meclîsê Dayîkanê Haştîye, 1996î ra nat bi laçikanê xo yê sipîyan seba haştîye xoverdayîşê xo ramnenê. Hetê endamanê Meclîsê Dayîkanê Haştîye yê Êlihî ra tehdayî ameyê rexnekerdiş û înan dîyar kerd ke do xoverdayîşê înan dewam bikero.

Dayîka Haştîye Şukran Akkurtî va, “Tersanê xo ver dayîkanê haştîye rê heqaretan kenê. Nika her het ra zeîf ê. Dayîkanê Şemeyî rê hêrişî yenê kerdene. Dayîkî wazenê waştişanê xo îfade bikerê la hetê polîsan ra raştê heqaretan yenê.”

‘Erdê ma yeno bombakerdiş’

Dayîkanê Haştîye ra Sultan Azboye zî va, “Vera domananê ma, dayîkanê ma, xoza, heywan û çiyê kurdan esto vera înan hêrişî yenê kerdene. Her roje bi teyareyan erdê ma yeno bombakerdiş. Bi roniştiş xoverdayîş nêbeno. Xoverdayîş berpirsîyarîya her kesî de yo. Ganî tora xoverdayîşî bêra awankerdene. Eke nîya nêbo do zulim hîna zêde bizêdîyo.”

‘Kesê ke haştîye wazenê hedef de yê’

Dayîkanê Haştîye ra Kamîla Şîmşeke va, “Ma timûtim vanê haştîye la kes goş nêdano ma. ÎŞkence û neheqîyî dewam kenê. Birêz Ocalanî ra rewna yo xebere nîna girewtene. Dewlete, haştîyêka birûmete ra çîyêk fam nêkena. Kesê ke haştîyêka birûmete wazenê tim hedef de yê. Ma ganî vera nînan xoverdayîşê xo biramnê.”