Cinîya kurde Jîna Emînî 13yê êlule 2022yî de seba ke gijikê ci asayêne hetê polîsanê exlaqî yê rejîmê Îranî ra amebî destbendkerdene û 16ê êlule de zî îşkenceyan ra dinyaya xo bedilnabî.
Serrêke verê cû Jîna Emînî ya ke hetê polîsanê exlaqî yê dewleta Îranî ra bi îşkenceyî amebî qetilkerdene, pêro dinya de veng vet. Aye ra dima sloganê Jin, Jiyan û Azadî sembolê xoverdayîşî bî.
Birayê Jîna Emînî Kîarash Emînîyî pare kerd ke wexto ke verê qereqolî de o pabeyê waya xo bîyo polîsan pê gazê îsotî hêrişê înan kerdo. Emînîyî vat: “Şewe her cinîya ke qereqolî ra vejîyayêne vatêne ‘yewe kişîyaye.’ Mi fotografê Jîna mojna înan û înan vat ke Jîna kişîyaya. Jîna verê qereqolî ra pê ambulansî ameye berdene bi nêweşxaneyî. Nêweşxaneyê Kasra de ame îdîakerdene ke Jîna de meseleya qelbî est a. La mi bi çimanê xo dî ke rî, ling û bedenê aye reş bîyê.”
Dima ke Jîna Emînî dinyaya xo bedilnaye çalakîya verêne şaristanê Seqizî yê Rojhelatê Kurdistanî de ameye kerdene.
PJAK û KODARî vera qetilkerdişê Jîna Emînî veng da û naye ser o şarê Seqiz, Sine, Şîno, Bûkan û Bane 19ê êlule de bi şîarê ‘Jin, Jiyan, Azadî’ grevo pêroyî kerd.
Goreyê xebera Le Monde çalakîyanê 6 rojanê verênan de 17 kesan dinyaya xo bedilnaye. Selahîyetdaranê Îranî dîyar kerd ke 6 rojan de çalakîker û polîsî zî tede 17 kesan dinyaya xo bedilnaya.
XWEBÛN
parvê bike
Nûçeyên ku dikare bala we bikşîne
