Komeleya Cigêrayîşanê Kurdkî kongraya xo ya 4ine viraşte

Komeleya Cigêrayîşanê Kurdkî kongreya xo viraşte û hemserekê neweyî yê komele ameyê weçînayene.

Komeleya Cigêrayîşanê Kurdkî, awanîya xo ya Îstanbûl Fatîhî de kongreya xo ya 4ine viraşte. Xeylê temsîlkarê partî û sazîyan bîyê beşdarê kongre. Kongre, bi payravindertişê hurmetî dest pêkerde û xebatanê komele ser o sînevîzyonêk dîya temaşekerdene.

Hemserekê Komeleya Cigêrayîşanê Kurdkî Eyup Sûbaşiyî dîyar kerd ke seba ke Kurdkî pay ra bimana ganî hîna zêde xoverdayîş bêro dayene û ganî Kurdî wayîrê ziwanê xo bivejîyê.

Hemsereka komeleye Remzîye Alparslane zî bale ante perwerdeyê domanan ser o û va, “Seba ke ziwanê ma pay ra bimano xebatê ke yenê kerdene zaf muhîm ê. Ma wexto ke bewnê tarîxê enstîtuye ra, ez ê heyecanî reyna hîs kena. Ma ganî wayîrê nê mîrasî bivejîyê. Bi saya embazanê xo ma ameyê nê rojan. Ewro ra têpîya zî do no mîras û xoverdayîş dewam bikerê.”

Ziwannas Zana Farqînîyî zî va, “Ma embazanê ke mîyanê ma de nîyê bi hurmetî yad kenê. Çîyo muhîm, ganî kesêk bibê ke ma ra pey nê xebatan bikerê. Eke nîya bo ma eşkenê vajê ke ma bîyê serkewte. No semed ra zî ma ganî sazîyanê xo çend ma dest ra yeno hêzdar bikerê.”

Qiseykerdişan ra dima weçînayîş ame kerdene û Remzîye Alparslane û Heno Ronak bîyê hemserekê neweyî yê komeleye.

MA / ÎSTANBÛL