Kurd, Elewî û multecîyan rê serrêk mîyan de tewt kêmî 208 hêrişî ameyê kerdene

Merkezê Cigêrayîşanê Warî yê Sosyo Polîtîkî dîyar kerd ke 2023yî de Kurd, Elewî û multecîyî tewr kêmî raştê 208 hêrişanê nîjadperestan ameyê.

Merkezê Cigêrayîşanê Warî yê Sosyo Polîtîkî, derheqê hêrişanê ke 2023yî de Kurd, Elewî û mıltecîyan rê bîyê de raporêk hedre kerd û pare kerd. Raporê înan bi malumatanê çapemenîye ameyo hedrekerdene. Goreyê nê raporî, 2023yî de 208 hêrişê nîjadperestî ameyê kerdene.

Ameyo dîyarkerdiş ke vateyanê îqtîdar û muxalefetî ver xeylê hêrişî ameyê kerdene. Roporî de dîyar bîyo ke erdlerzê Mereşî ra dima multecîyan rê hêrişê nîjadperestî bîyê û vera dewanê Elewîyan cîyakarîye ameye ramitene.

Reyna raporî de ame dîyarkerdiş ke ziwanê Kurdkî rê xeylê hêrişî ameyê kerdene û metropolan de vera Kurdan hêrişê nîjadperestî ameyê kerdene.

Ame vatene ke, “Wextêko derg Kurd û Elewîyan senî ke nasnameyê xo nimitêne, nika zî multecîyî nasnameyê xo nimnenê û tersenê ziwanê xo qisey bikerê. Sere de Amedspor û taximê mintiqa wexto ke şonê deplasmanan raştê hêrişanê nîjadperestan û şîdetî yenê. Hema zî TBMM de ziwanê Kurdkî sey ‘ziwano ke nîno zanitene, ziwanê Xî’ yeno namekerdene. Awanîyê partîyan û fîrmayê otobusan raştê hêrişanê nîjadperestan yenê.

Nasname û ziwanê Kurdan rê hêrişî

Ameyo dîyarkerdiş ke tespît bîyo ke serrêk de ziwan û nasnameyê Kurdan rê 145 hêrişî bîyê û ameyo vatene ke, “Hêrişê ke nasnameyê Kurdan rê benê, hîna zêde Kurdkî, taximanê futbolî û tercîhanê polîtîkan ser ra yenê kerdene. Reyna çapemenîye de ca girewto ke 50 hêrişê nîjadperestî multecîyan rê bîyû û Elewîyan rê zî 13 hêrişî ameyê kerdene.”

MERKEZÊ XEBERAN