Ahmet Turk: Namayê ‘Esat Oktay’î danê wendegehêk û xelate danê îşkencekaran

Sîyasetmedar Ahmet Turk o ke raştê îşkenceyanê Esat Oktay Yildiranî ameyo va, “Mesaj yeno dayene ke xelate dîyena îşkencekaran.”

Qezaya Bûcaye ya Izmîrî de nameyê Esat Oktay Yildiranî dîya wendegehêk. Esat Oktay, zindanê Amedî de bi îşkenceyan xeylê kesî kiştê. Namedayîşê ey hetê xeylê kesan ra ame şermezarkerdene.

‘Şermêko pîl o’

Sîyasetmedar Ahmet Turk o ke zindanê Amedî de raştê îşkenceyanê Esat Oktayî ame na mesela erjnaye. Ey dîyar kerd ke no proses vernîya îşkencekar û qetilkaran akerdiş o. 

Turkî dîyar kerd ke no şermêko pîl o û va, “No merdim hetê her kesî ra yeno zanayene. Tena girewteyan ney, keyeyan zî zanayêne ke o îşkencekar û qetilkar o. Eke nameyê yew qetilkarî ke dîyeno wendehehêk, kes nêşkeno behsê demokrasîyî bikero. Ganî pêro demokratî vera ney bivejîyê.”

Turkî va, “No rejîm wazeno şarî bipelixno û bitersno. Nameyê qetilkarêk danê wendegehêk. No şermêko pîl o. Xelate dîyena îşkencekarêkî. No vernîya îşcencekar û qetilkaran akeno.”

‘Na xelate dîyaya dişmenanê Kurdan’

Turkî behsê îşkenceyanê Esat Oktayî kerd û va, “Rojêk ez kerda zitbulit û mabênê 200 eskerî de bi copan dayê mi ro. Eskeran ra vatêne, ‘No merdim parlamenter bîyo, no merdim çepgir bîyo, rewşa ci nika na ya. Bêrê şima zî bivînê’ û eskerî fîtkerdêne. No îşkence yew-di rey ney bi seyan rey ame kerdene. Xelate dîyaya dişmenanê demokrasî, merdimîye û Kurdan.”
MERKEZÊ XEBERAN