Hemserekê DEM Partî: Faîlê qetlîaman sûcanê xo yew bi yew îtîraf kenê

Hemserekanê DEM Partî vateyanê Akşenere ser o va, “Ma zanitêne faîlî mechûlî bi namerdane ameyê kerdene. Nika zîhnîyeto qetlîamkar sûcanê xo îtîraf keno.”

Hemserekanê DEM Partî Tulay Hatîmogûllari û Tuncer Bakirhanî, cewab da vateyanê Sereka Pêroyî ya ÎYÎ Partî Meral Akşenere yê “Ma verî zî bîyê şahidê cînayetanê sîyasîyan la ê camêrdane bî”.

‘Vera qetlîamkaran ma do haştîye awan bikerê’

Hemsereka Pêroyî ya DEM Partî Tulay Hatîmogûlları hesabê xo yê dîjîtalî ser ra va, “Eke camêrdîye na ya, nalet şêro camêrdîya şima! Kasanê ke Kurdî, Elewîyî, Sosyalîstî, Ermenîyî û roşnvîrî qetil kerdê, verê tarîx komelî de ameyê mehkûmkerdiş. Dişmenî zî yew exlaqê xo est o la namerdîya înan dinya de vend dayo. Çîyê ke wero fekê înan ra vejîyenê, îtîrafê zîhnîyetê qetlîamkarî yê. Ma sond wanenê ke ma do vera qetlîmkaran haştîye awan bikerê.”

‘Xoverdayîş do zulmatê şima vay bido’

Bakirhanî zî va, “Qetlîamkarî, înan ke dewî kerdê veng yew bi yew sûcanê xo îtîraf kenê. Mûsa Anter, Mehmet Sîncar, Muhsîn Melîk, Hrant Dînk bi hezaran kesîma zanitêne ke bi namerdane ameye qetilkerdiş. Nika şima bi xo îtîraf kenê. Seserra 2yine ya komare de mabenê namerdan û xoverdayoxanê haştîya birûmete de xoverdayîş beno. Terefo hîrêyin çin o. Xoverdayîşê haştîye û demokrasîyî do zulmatê şima vay bido.”

MERKEZÊ XEBERAN