Maher al-Agal ‘mintiqaya ewleye’ ya Tirkîya de ame kiştiş

pêncşem 14 tîrmehê 2022 - 10:44

  • Serekçeteyê Daîşî Maher al-Agal mîyanê ‘mintiqaya ewleye’ ya Tirkîya de, Cerablûs de ame kiştiş.

Têkiliyê Daîş û Tirkîya ‘mintiqaya ewleye’ ya Tirkîya de roje bir oje eşkera benê. Serekçeteyê Daîşî Maher al-Agal mîyanê ‘mintiqaya ewleye’ ya Tirkîya de, Cerablûs de ame kiştiş.

Çeteyê Daîşî cayanê îşxalkerdîyanê Tirkîya de organîze benê. Ceraslûs zî hetê Tirkîya û çeteyanê ci ra ameybî îşxalkerdiş. Vîzêr serekçeteyê Daîşî Maher al-Agal Cerablûs de ame kiştiş. Komûtanîya Hêzanê Merkezî yê Amerîka(CENTCOM)yî kerde eşkera ke, înan bi hêrîşa hewayî Maher al-Agalî kişto. Goreyê malûmatanê înan wezîfedaro berz o bîn zî bi giran bîyo birîndar.

Maher al-Agal kam o?

Maher al-Agal Girê Sipî ra yo. Maher Walîyê Daîşî yê Şamî bi. Mîyanê Daîşî de merdimo 4in o. Keyeyê ci zî sey ey Daîşij ê. Înan hêrîşa Kobanîyî de zî ca girewto. Nika bi hîmayeya Tirkîya Bab û Efrînî de cuwîyenê.

Birayê ci zî ameyê kiştiş

Birayê Maherî Fayiz al-Agal wextê îşxalê Reqayî walîyê Reqayî bi. 20020î de mintiqayanê Tirkîya de hetê hêzanê koalîsyonî ame kiştiş. Birayê ci Îzzo zî hetê koalîsyonî ra ame kiştiş. Maher al-Agalo qetlîamkar lîsteyanê mîyannetewîyan de bi. Mehkemayanê Tirkan de sey ‘Faîlê Qetlîaman’ vîyareno la bi serran bi belgeyanê Tirkan mîyanê konforî de cuwîya.

Plankerdoxê qetlîamanê Pirsûs û Sultanahmetî

Maher al-Agal qetlîamê Pirsûsî plan kerdibi û bombayî hetê ey ra sînor ra ameybî vîyarnayîş. Lajê apê ci  Suleyman al-Agalî derheqê ey de nê çîyî vatibî. Wezaretîya Karanê Zereyî ya Tirkîya 12ê Çileyî yê 2021î de vatibî, “Plankerdox û faîlê teqayîşanê Pirsûs û Sultanahmedî  Suleyman al-Agal, Maher al-Agalî reyde pîya hereket kerdo.”

Ne verîn o ne peyên

Daîş ‘mintiqayanê ewleyîyan’ ê Tirkîya de organîze beno. Heya ke îşxalî meqedîyê û nê çeteyi mehkema mebê, mesela safî nêbena. Serekçeteyê Daîşî cayanê îşxalbîyayîyan de yenê kiştiş. Tewr peynî Maher al- Agal Cerablûs de ameyo kiştiş. No ne verên o ne peyên o. Îdarekarê Daîşî Hani Ehmed El-Kurdî Cerablûsî de gêrîyabi binê çimî. Ehmed El-Kurdî verî cû emîrê Reqayî bi. Ebû Îbrahîm El Haşîmî yo ke kewtibi cayê Bexdadîyî, sînorê Tirkîya de amebi kiştiş. Serekê Daîşî Ebubekîr El-Bexdadî zî 2019î de Îdlîbî de amebi kiştiş.

MERKEZÊ XEBERAN

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.