‘Serêkanîyê û Girê Spî de DAÎŞ organîze beno’

• Serêkanîyê û Girê Spî 3 serrî verî cû hetê Tirkîya ra ameyê îşxalkerdiş. Nê bajaran de DAÎŞ newe ra organîze beno.

EMRULLAH ACAR / MA / RIHA

Serêkanîyê û Girê Spî hetê Tirkîya û SMOyî ra 3 serrî verî cû ameyê îşxalkerdiş. Nê cayan de xeylê sûcî û vurînayîşê demografîkî ameyê kerdene. Nê bajarî bîyê halînê hêzanê paramîlîteran û tîya ra xeylê cayî yenê tehtîdkerdiş. Goreyê malûmatanê Rêxistinê Heqanê Merdiman ê Mintiqaya Cizîrî hêrîşanê Serêkanîyê û Girê Sipî de 429 welatîyî merdê û 450 hesar kesan ra zêderî ameyê girewtiş û remnayîş.

Girê Spî ra 100 kesî ra, Serêkanîyê ra zî 200 hezar kesî ra zêder kesî mecbûrê koçkerdişî bîyê. Tirkîya ra 6 hezar multecîyî Girê Spî de ca bîyê û 1800 zêder DAÎŞij û keyeyê înan Serêkanîyê de ca bîyê.

Îdarekara Rêxistinê Heqanê Merdiman ê Mintiqaya Cizîrî Evîn Cuma derheqê rewşa nê cayan de qisey kerd.

Sivîlî hedef gêrîyayê

Evîn Cuma va, “Kesê ke mecbûrê koçkerdişî mendê, zafê înan kurdî bî. Hêrîşî bi barbarî ameyê kerdene. Çekê giranî ameyê gurînayîş û xeylê sivîlî ameyê qetilkerdiş. Hêrîşan de bi zanayîş sivîlî hedef gêrîyayê. Kesê ke weş mendê mecbûrê koçkerdişî mendê û dest nîya keye û erdê înan ser. Kesê ke keyeyê xo terk nêkerd ameyê remnayene. Nê di bajaran de zî cuwîyayîş zaf zehmet o. Goreyê tespîtanê ma, 3 serrî de 450 kesî ameyê girewtiş û remnayîş.”

DAÎŞijî ca bîyê

Cuma va, “Kesê ke ameyê girewtene, Tirkîya de hepsan de yê. Cezaya muebbetî dîyaya xeylê kesan. 400 hezarî ra zêder kesî kampan de, binê şertanê giranan de cuwîyenê. Meqsedê nê zulmî vurînayîşê demografîkî bi. Şar mecbûrê koçî bi û DAÎŞijî û keyeyê înan ameyê cakerdiş. DAÎŞ bi xoverdayîşê şaran ame binvistiş û nika wazeno cayanê îşxalkerdîyan de newe ra wirzo payan ser.”

Sûcî ameyê tespîtkerdiş

Dewamê qiseykerdişê xo de Evîn Cuma va, “Tirkîya hêzanê mîyannetewîyan r ava ez do ‘mintiqaya ewleyine’ awan bikerê û îşxalê xo pîne kerd. Mintiqa de ewlehîye çin a. Seba kiriştîyan dewê neweyî ameyê awankerdiş. Binpaykerdişî verê çimanê hêzanê m3iyannetewîyan de qewimîyenê. Hêzanê garantoran ra vengêk nêvejîyeno. Bİnpaykerdişî ameyê tespîtkerdiş û raporkerdiş la heta nika hema vera Tirkîya çîyêk nêameyo kerdene. Seba ke şar bi ewlehîye agêro erdê xo ser, ganî Tirkîya mintiqa ra bêra vetîş.”

‘Cinîyî keyeyan de hepîs mendê’

Cuma va, “Verê îşxalî Serêkanîyê û Grê Spî de cinîyî her warê cuye de aktîf bî. Îşxalî ra dima cinîyî raştê îşkenceyan, tacîzan û remnayîşan ameyê. Xeylê cinîyî hepis de merdê. Zîhnîyetê DAÎŞî ver cinîyî cuye ra dûrî kewtê. Wazenê cinîyan bikerê kole û meverdê keye ra vejîyê teber. Komelo sîvîl cinîyan rê ameyo qedexekerdiş.”

Şarî rê gazîye

Evîn Cuma veng a welatîyanê Bakur û Rojhelatê Sûrîyeyî da û va, “Tirkîya wazena reyna hêrîşa mintiqa bikera. Îşxalêko newe mumkun nîyo ke bêro qebulkerdiş. Ganî her kes terse xo bido kiştêk û xo ver bido. Îşxalbîyayîşê merdiman mergê înan o. Ganî firsend nêdîyo polîtîkayanê vengkerdişî. Her kes ganî bibo yew û vera hêrîşan xo ver bido. Şar ke bibo yew kes nêşkeno kesî erdê ci ra bivejo.”