Uca: Tirkîya wazena DAÎŞî gande bikera

MA / Engîn ÇAGLAR

Sîyasetmedara Kurde Feleknas Uca dîyar kerd ke Tirkîya wazena bi hêrişanê xo DAÎŞî newe ra gande bikera.

Tirkîya 4ê Teşrîna Verêne ra nat hêrişê Bakur û Rojhelatê Sûrîyeyî kena. Hêrişan de 30 ra zêder sivîlî merdê. Parlamentera verêne ya HDPyî Feleknas Uca rewşe erjnaye.

Vateyê Fîdanî

Uca dîyar kerd ke Hakan Fîdanî vato Iraq û Sûrîyeyî de tesîsê ke aîdê PKK-YPGyî yê hedefe ma yê û bin ê vateyanê xo îtîrafê sûcêkî şerî kerdo. Uca dîyar kerd ke nê hêrişî reya verêne nêbenê. Ard vîrî ke Hakan Fîdan wexto ke serekê Mîtî bi vatibi ‘Hewce bikero ma çend merdiman erşawenê Sûrîye, wa çend fuzeyan bierzê Tirkîya û ma zî şer vejenê’.

‘Hêrişan de konseptêko newe kewto kar’

Uca dîyar kerd ke Tirkîya seba ke destkewteyanê Kurdan çin bikera verî cû seba hêrişanê erdî hedreyî kerdibî û va, “Hêzanê koalîsyonî destûr nêda Tirkîya. Hêrişa Taksîmî ra dima nîyetê înan bi la nika destûr danê hêrişanê hewayî yê Tirkîya. Sehaya hewayî destê Emerîka û Rusya de ya. Ê destûr mede, Tirkîya nêşkena hêrişan bikera. Bin ê hêrişan konseptêko newe kewto kar. Di hefteyî yo ke her roje hêrişî benê. Dinya vera hêrişan bêveng a. Tirkîya wazena bi hêrişanê xo DAÎŞî newe ra gande bikera.”a

Na dirîye ya

Uca va, “Seba Filistînî Ewrûpa û her cayê dinya de prptestoyî benê. Çira dinya Rojava rê bêveng a? Seba Kurdan zî seba Filistînijan zî ganî veng bêro vetene. Ganî mabênê mazlûman de cîyakarî meba. Ganî verê qetlîaman bêro girewtene. Partîyanê çepgiran kombîyayîşanê Konseyê Ewrûpa de nê çîyî vatê û bêvengî ameye protestokerdene.”

‘Ganî dinya wirza payan ser’

Uca peynî de va, “Ma ganî xoverdayîşê Kurdan birasnê her kesî. Ganî vera faşîzmî ma xoverdayîşê xo pîl bikerê. Sere de Kurdî û dostê Kurdan û her kes ganî vera nê hêrişan wirzê payan ser. Ma ganî dîplomasî bikerê. Rojava de sûcê şerî yenê kerdene. Kurdan senî ke xoverdayîşê Kobanî mojna dinya, ganî nê xoverdayîşî zî bimojnê.”