Mevzûatê Ceza yê Ewrûpayî nêşkeno vera PKKyî bêro gurînayîş

• Awiqatanê Baroya Brukselî ra Robîn Bronletî bale ante qerarê mehkemaya Belçîkayî û va, “Mevzûatê Ceza yê Ewrûpayî nêşkeno vera PKKyî bêro gurînayîş.”

EYLEM AKDAG – RÛKEN POLAT / MA / DÎYARBEKIR

Seba ke PKK lîsteya terorî ya Ewrûpa ra vejîya 3 mîlyon îmzayî ameyê arêdayîş. Îmzayî hetê sazîyan ra erşawîyayê Komîsyonê Ewrûpayî. Awiqatanê Baroya Brukselî ra Robin Bronletî derheqê rewşe de erjnayîşî kerdê.

Bronletî va, ‘Ma senî ke prosesê NATOyî yê Swêdî de zî dî, Tirkîya hemwelatîyanê xo yê Kurdan sey terorîstan sûcdar kena û înan ser ra dewletan rê teda kena. Belçîka de zî verî cû rewşe wina bî.”

‘Vera endamtîya PKKyî dewa çin a’

Bronletî va, “Verî cû Belçîka de xeylê mehkemayê ceya bîyê. Qerarê mehkemaya pîlî ra dima nê mehkemayî qedîyayê. Mehkema qerar da ke, mabênê Tirkîya û PKKyî de şerêko çekdarî yo esto û PKK perêkî nê şerî yo. Coka endamtîya PKKyî hinî nêbena behsê sûcdarîye. 2015î ra nat bi sûcdarîya endamtîya PKKyî dewayî çin ê. No yeno no vate ke, eşkeno bêro îddîakerdiş ke, dewletanê bînan ê ewrûpayî de zî no mevzûat nêşkeno vera PKKyî bêro gurînayîş.”

‘Ganî cigêrayîşo cidî bêro kerdene’

Bronletî peynî de va, “Derheqê rewşa Îmraliyî de malûmatê ma estê û sûcê şerî yê dewleta Tirke hetê xeylê kesan ra yenê rexnekerdiş. Derheqê çekanê kîmyewîyan de malûmatî rasayê ma dest. Goreyê malûmatan, cendekan rê îşkenceyî ameyê kerdene. Ganî derheqê nê sûcan de cigêrayîşêko cidî bêro kerdene.”

Dewaya Belçîkayî de se bibi?

Hetê Mehkemaya Îstînafî ya Belçîka ra 8ê Adare 2019î de qerar ame girewtiş ke, mabênê PKK û Tirkîya de şerêko çekdarî esto û PKK zî rêxistinê terorî nîyo.