Vera ‘lîsteya terorî’ Qibrisî de 23 hezar îmzayî pêser kerdê

CEYLAN ŞAHÎNLÎ / MA / RIHA

Nêweşê kanserî Îsmet Tîmurturkkanî seba ke PKK lîsteya terorî ra bivejîyo, Qibrisî de 23 hezar îmzayî pêser kerdê.

Îsmet Tîmurturkkanî 2006î de Riha Pirsûsî ra koç kerdo şîyo Qibris. Tîmurturkkan seba ke PKK lîsteya terorî ra bivejîyo paştî dano kampanyaya îmzayan û 25ê Gulane ra nat Qibris de îmzayan pêser keno. Îsmet Tîmurkurkanî va, “Ma embazanê xo reyde paştî da kampanya û ma daxîlê kampanyaye bîyê. Aşmêk de mi 21 hezar 500 îmzayî daye arê. La nêweşîya xo ver ez zaf nêşkaya xebate biramnî. Heta nika mi 23 hezar îmzayî pêser kerdê.”

‘Ocalan bandorêko pozîtîf keno’

Îsmet Tîmurtukkanî va, “Ma ekserî îzayan turîstan ra danê arê. Ma wexto ke behsê rewşa Kurdan kenê paştî danê kampanya û wexto ke ma vanê Ocalan, no înan ser de bandorêko pozîtîf keno. Eke PKK lîsteya terorî ra bivejîyo do xeylê çîyî çareser bibê. Abdullah Ocalan û hepsîyê sîyasîyî do bêrê veradayîş. Ganî pêro Kurdî û dostê Kurdan paştî bidê na kampanya. Ewro roja roniştişî nîya.”