Muslîm: Têkilîya hêrîşkare bi OSOyî reyde esta

Hemserekê PYDyî Salih Muslîmî dîyar kerd ke hêrîşa Taksîmî komployêk a û têkilîya hêrîşkare bi OSOyî reyde esta.

Hêrîşa Taksîmî ser o munaqeşayî dewam kenê. Na hêrîşe de 6 kesî merdibî û xeylê kesî zî birîndar bibî. Hukmatî îddîa kerd ke hêrîşe hetê PKKyî ameya kerdene û hêrîşkare zî Bakûr û Rojhelatê Sûrîyeyî ra ameya. Nê îddîayî ameyê redkerdiş û ame vatiş ke hêrişan rê binge yeno viraştene. Hemserekê PYDyî Salih Muslîmî derheqê mesele de ANFyî rê qisey kerd.

Salih Muslîmî va, “Na hêrîşêka terorî ya û sey her kesî ma zî na hêrîşe şermezar kenê. Nê entrîkayê Osmanîyan ê û kesî rê feydeyê înan çin o. Hetê hêzanê Rojavayî, QSD û Îdareyê Xoserî ra verî ra nat malûmatî ameyê kerdene û hêrîşe ameye şermezarkerdene.”

Muslîmî va, “Hêrîşê ke vera Rojavayî benê dewam kenê. Beno ke hêrîşê înan bizêdîyê. Ganî hêzê ma vera nê hêrîşan xo hedre bikerê. Kobanî bi zanayîş hedef gêrîyeno û wazenê heyf bigerê. Çunke DAÎŞ tîya de ame binvistiş. Coka Kobanî û Minbîc hedef gêrîyenê. N3iya aseno ke senaryoyê înan hedre yê. Key ke firfend kewt dest, do hêrîşe bikerê.”

‘Têkilîya hêrîşkare bi OSOyî reyde esta’

Salih Muslimî derheqê hêrîşkare de va, “Mintiqayanê ma de kes aye nêşinasneno. Hesabanê aye ra dîyar beno ke, têkilîya aye bi komanê OSOyî reyde esta. Bi flamayanê koma Sultan Muradî fotografê ci estê. Na kese Kurde zî nîya. Têkilîya ci Kurdan reyde û Îdareyê Rojavayî reyde çin a.”

Muslîmî peynî de va, “Hêrîşa provakatîfe ra dima Kurdî hedef gêrîyenê. Ganî hêzê demokratî vera nînan baldar bê. 1970an ra nat nê provakasyonî hetê Daîreyê Şerê Taybetî ra yenê kerdene û nê yenê zanitene. Ma wextêkî xesasî ra vîyerenê. Wazenê bin ê çîyan emrê xo derg bikerê. Ma ganî balder bibê û tedbîranê xo bigerê.”

MERKEZÊ XEBERAN