PYD: Tirkîya hêrîşanê xo rê binge virazena

Hetê PYDyî ra hêrîşa Îstanbûlî ameye şermezarkerdiş û PYDyî dîyar kerd ke, Tirkîya wazena bi sûcdarkerdişî hêrîşanê xo rê binge biviraza.

Meclîsa Pêroyî ya PYDyî derheqê hêrîşa Îstanbûlî û sûcdarkerdişanê Tirkîya de malûmato nuştekî weşana. Malûmatî de ame vatiş ke, “Ma hêrîşa Îstanbûl Taksîmî ya ke vera sîvîlan ameya kerdene şermezar kenê, keyeyanê merdeyan rê sabir wawenê û birîndaran rê zî şîfa wazenê. No vera însanan sûcêka pîl o.”

Dewamê malûmatî de ame vatiş ke, “Tirkîya vera mintiqayanê ma hêrîşanê xo ramnena. Tirkîya wazena na hêrîşa barbare bierza hêzanê ma ser. Amancê aye hêrîşanê xo rê binge viraştiş o. Malûmatê ke çapemenîya Tirkan de ca genê, hetê Mîtî ra ameyê hedrekerdiş. Wazenê hêzanê QSDyî xirab ramojnê û seba îşxalî dinya îqna bikerê. Nê kerdenî newe nîyê. Tirkîya vera hêzanê demokratîkan û şaranê Tirkîya sûcî kerdê. Ma komelê mîyannetewî ra vanê ma mekewê na dafika leyşine. Hukmatê şerê taybetî yê Tirkîya, wazeno hêrîşanê kîmyewîyan û sûcanê xo binimno. Ma şaranê Tirkîya ra vanê, wa vera propagandayanê MÎTî baldar bê û zuranê înan ra bawer mekerê.”

MERKEZÊ XEBERAN